ప్లే ఏరియాగా మారిన ట్రంప్ వాల్!

తాను అధికారంలోకి వచ్చినంతనే అమెరికా- మెక్సికో మధ్య గోడ కట్టేస్తానంటూ సంచలన వ్యాఖ్య చేసిన అమెరికా అధ్యక్షుడు డొనాల్ట్ ట్రంప్.. తాను చెప్పిన రీతిలోనే గోడను నిర్మిస్తున్న వైనం తెలిసిందే. గోడ అంటే గోడ కాకుండా.. కొన్నిచోట్ల కాంక్రీట్.. మరికొన్నిచోట్ల స్టీల్.. ఇనుముతో పెద్ద ఎత్తున గోడను కట్టిస్తున్న సంగతి తెలిసిందే. మెక్సీకో నుంచి వచ్చే అక్రమ వలసల్నినిరోధించేందుకు వీలుగా నిర్మిస్తున్న ఈ వాల్ మీద ఉన్న వివాదం అంతా ఇంతా కాదు.

ఇప్పటికే తాను నిర్మించే గోడ మీద పలు వివాదాస్పద వ్యాఖ్యలు చేశారు ట్రంప్. తాజాగా ఈ వాల్ కు సంబంధించి ఒక వీడియో వైరల్ గా మారింది. రెండు దేశాల నడుమ అడ్డుగోడ కాస్తా.. ఇప్పుడు ఇరు ప్రాంతాల వారికి ఒక ప్లే స్టేషన్ గా మారిన వైనం ఆసక్తికరంగా మారింది.

అమెరికా.. మెక్సికో దేశాల మధ్య నిర్మిస్తున్న భారీ గోడకు సంబంధించి పలు చోట ఊగుడు బల్లల్ని అమరుస్తున్నారు. సరిహద్దులకు ఇరువైపుల ఉన్న వారు ఈ ఊగుడుబల్లల్ని వినియోగిస్తూ ఎంజాయ్ చేస్తున్నారు. ఈ గోడతో రెండు దేశాల మధ్య ఉద్రిక్తతలు పెరుగుతాయన్న మాట ఓపక్క వినిపిస్తుంటే..మరోవైపు రెండు దేశాలకు చెందిన ప్రజలు.. సరిహద్దుల్లో గోడకు చెరోవైపు ఏర్పాటు చేసిన ఊగుడు బల్లలతో పిల్లలు.. పెద్దలు ఉత్సాహంగా ఆడేసుకుంటున్న వైనం సోషల్ మీడియాలో ఇప్పుడు వైరల్ గా మారింది.