ఎమ్మెల్సీ సురభి వాణీదేవి కారుకు ప్రమాదం!

కొత్తగా ఎన్నికైన హైదరాబాద్ ,రంగారెడ్డి , మహబూబ్ నగర్ పట్టభద్రుల టిఆర్ ఎస్ ఎమ్మెల్సీ సురభి వాణీదేవి కారు ప్రమాదానికి గురైంది. ఈ ప్రమాదం సమయంలో ఎమ్మెల్సీ సురభి వాణీదేవి కారులో లేకపోవడంతో పెద్ద ప్రమాదం తప్పింది. హైదరాబబాద్-రంగారెడ్డి-మహబూబ్ నగర్ పట్టభద్రుల స్థానానికి ఇటీవల జరిగిన ఎన్నికల్లో వాణీదేవి విజయం సాధించిన విషయం తెలిసిందే. ఈ నేపథ్యంలోనే గురువారం అసెంబ్లీలో స్పీకర్‌ని కలిసేందుకు ఆమె కారులో వచ్చారు. వాణీదేవి అసెంబ్లీ లోపలికి వెళ్లిన తర్వాత డ్రైవర్‌ కారును 8వ నంబర్ పార్కింగ్‌ ప్లేస్‌లో నిలిపాడు. కాసేపటి తర్వాత కారును అక్కడి నుంచి పక్కకు తీయాల్సి వచ్చింది.

అయితే డ్రైవర్ అందుబాటులో లేకపోవడంతో అక్కడే విధుల్లో ఉన్న గన్‌ మెన్ కారును నడిపేందుకు సిద్దమయ్యాడు. ఈ క్రమంలోనే బ్రేక్‌కి బదులు యాక్సిలేటర్ తొక్కడంతో కారు అదుపుతప్పి విధుల్లో ఉన్న పోలీసులపైకి దూసుకెళ్లింది. వారంతా అప్రమత్తమై తప్పించుకోగా కారు పార్కింగ్ గేటును బలంగా ఢీకొట్టింది. ఈ ఘటనలో కారు ముందు భాగం నుజ్జునుజ్జయింది. ఈ ఘటనతో అసెంబ్లీ ఆవరణలో భారీ శబ్ధం రావడంతో పోలీసులు అప్రమత్తమయ్యారు. అసెంబ్లీ ప్రాంగణంలో ఉన్న అనేక మంది ఏం జరిగిందో తెలీక చాలా కంగారుపడ్డారు. గన్‌ మెన్‌ కు డ్రైవింగ్ సరిగ్గా రాకపోవడం వల్లే ఈ ఘటన జరిగిందని పోలీసులు చెబుతున్నారు. భద్రతా సిబ్బంది అప్రమత్తమై తప్పించుకోకపోతే ప్రాణనష్టం జరిగేదని చెప్పారు.