మూడోసారి `టైమ్స్-100` కోసం మోదీ!

భార‌త్ ప్ర‌ధాని న‌రేంద్ర మోదీకి మ‌రో అర‌దైన గౌర‌వం ద‌క్కింది. వరుస‌గా మూడో ఏడాది కూడా మోదీ.....ప్రముఖ మ్యాగజైన్ టైమ్స్‌ ఏటా విడుదల చేసే జాబితాకు పోటీ ప‌డుతున్నారు. ``ప్రపంచవ్యాప్తంగా అత్యంత ప్రభావశీలురైన 100 మంది జాబితా`` కోసం ప్ర‌ధాని మోదీ పేరు మ‌రోసారి ప‌రిశీల‌న‌కు రావ‌డం విశేషం. ప్రపంచవ్యాప్తంగా ఎక్కువ ప్ర‌ఖ్యాతి గాంచిన‌ - ప్ర‌పంచాన్ని ప్ర‌భావితం చేసిన 100 మంది ప్ర‌ముఖుల జాబితాను ప్ర‌ఖ్యాత టైమ్స్ మ్యాగ‌జైన్ ఎంపిక చేస్తుంది. రాజకీయ నాయకులు - శాస్త్రవేత్తలు - ఉద్యమకారులు - కళాకారులు - వ్యాపారవేత్తలు - సాంకేతిక నిపుణల పేర్ల‌ను ఆ జాబితా కోసం ప‌రిశీలిస్తుంది. వారిలో నుంచి 100 మందిని ఎంపిక చేసి ``టైమ్స్‌ మ్యాగజైన్‌-100`` జాబితాను ప్ర‌తి ఏటా ఏప్రిల్‌ లో విడుదల చేస్తుంది. తాజాగా, 2018 సంవ‌త్స‌రానికి గానూ విడుద‌ల‌చేయ‌నున్న జాబితాకు గానూ మోదీ పేరును ప‌రిశీలిస్తున్నారు.

ఈ ఏడాది 100 మంది ప్రభావశీలుల‌ జాబితాలో చోటు కోసం మోదీతో పాటు అమెరికా అధ్యక్షుడు డొనాల్డ్‌ ట్రంప్‌ - రష్యా అధ్యక్షుడు వ్లాదిమర్‌ పుతిన్‌ - చైనా అధ్యక్షుడు జిన్‌ పింగ్‌ - మైక్రోసాఫ్ట్‌ సీఈవో సత్య నాదేళ్ల - ఉత్తరకొరియా అధ్యక్షుడు కిమ్‌ జోంగ్‌ ఉన్‌ - ట్రంప్‌ కుమార్తె ఇవాంకా ట్రంప్‌ - ఫేస్‌ బుక్‌ సీఈవో మార్క్‌ జుకర్‌ బర్గ్‌ - అమెజాన్‌ అధినేత జెఫ్‌ బెజోస్‌ - బ్రిటన్‌ రాజ కుటుంబీకులు ప్రిన్స్‌ విలియమ్‌ - కేట్‌ మిడిల్టన్‌ - ప్రిన్స్‌ హ్యారీ - అమెరికా మాజీ అధ్యక్షుడు బరాక్‌ ఒబామా తదితరులు పోటీ పడుతున్నారు. వ‌చ్చే నెల‌లో ఆ జాబితాను విడుద‌ల చేయ‌నున్నారు. 2016 - 2017 జాబితా కోసం మోదీ పేరు ప‌రిశీల‌నకు వ‌చ్చింది. కాగా, 2016 - 2017లో విడుదల చేసిన 100 మంది ప్రభావశీలుల జాబితా కోసం మోదీ పేరు ప‌రిశీల‌న‌కు వ‌చ్చింది. అయితే, 2015లో విడుద‌లైన‌ ``ప్రపంచవ్యాప్తంగా అత్యంత ప్రభావశీలురైన 100 మంది జాబితా``లో మోదీ చోటు ద‌క్కించుకున్నారు.