టైమ్సు టాప్ లిస్టులో మళ్లీ మోడీ

ప్రపంచంలోని అత్యంత ప్రభావవంతమైన వ్యక్తుల పేర్లతో ప్రఖ్యాత టైమ్స్ మ్యాగజైన్ రూపొందించిన జాబితాలో భారత ప్రధాని నరేంద్రమోడీ - మెక్రోసాఫ్టు సీఈఓ సత్య నాదెళ్ల - టెన్నిస్ స్టార్ సానియా మీర్జా - బాలీవుడ్ నటి ప్రియాంక చోప్రా - గూగుల్ సీఈఓ సుందర్ పిచాయ్‌ లు చోటు దక్కించుకున్నారు. ప్రపంచ వ్యాప్తంగా రాజకీయ నేతలు - సైన్సు అండ్ టెక్నాలజీ - ఇతర రంగాలకు చెందిన 127 మంది పేర్లతో ఈ జాబితాను రూపొందించింది. 'టైమ్ 100' పేరిట వీరిలో అత్యంత శక్తిమంతుల జాబితాను వచ్చే నెలలో విడుదల చేయనుంది. పాఠకుల ఓట్ల ఆధారంగా ఈ జాబితాను టైమ్ మ్యాగజైన్ రూపొందించనుంది.

తన జాబితా విడుదల నేపథ్యంలో అందులోని ప్రభావశీల వ్యక్తుల గురించి టైమ్స్ ప్రశంసలు కురిపించింది. ప్రధాని మోడీ ప్రపంచ వేదికపై శక్తిమంతమైన స్వరంగా కొనసాగుతున్నారని ప్రశంసించింది. గతేడాది కూడా మోడీ ఈ జాబితాలో చోటు దక్కించుకున్నారు. మహిళల టెన్నిస్ డబుల్సు విభాగంలో నంబర్ వన్ ర్యాంకు సాధించిన సానియా స్వదేశంలో క్రీడాకారిణులకు స్ఫూర్తిగా నిలిచారని కొనియాడింది. కాగా 'క్వాంటికో' షోలో నటించడం ద్వారా ప్రియాంకా చోప్రా హాలీవుడ్ దృష్టిని ఆకర్షించారని టైమ్ పేర్కొంది. ఇక భారత సంతతికి చెందిన మైక్సోసాప్ట్ సీఈఓ సత్య నాదెళ్ల విండోస్ 10ను విజయవంతంగా ప్రవేశపెట్టారని, ఆయన సారథ్యంలో క్లౌడ్ టెక్నాలజీ బిజినెస్ ఊపంచుకుందని తెలిపింది. ఆండ్రాయిడ్, యూట్యూబ్‌ తో విదేశాల్లో కోర్ బిజినెస్‌ ను గూగుల్ సీఈఓ సుందర్ పిచాయ్ పెంచారని కొనియాడింది. భారత సంతతికి చెందిన హీరో అజీజ్ అన్సారీ కూడా ఈ జాబితాలో చోటు దక్కించుకున్నారు. వీరితో పాటు గూగుల్ సహవ్యవస్థాపకుడు లారీ పేజ్ - ఫేస్‌ బుక్ సీఈఓ జుకర్ బర్గు - ఆయన భార్య ప్రిసిల్లా చాన్ - స్పేస్ ఎక్సు సీఈఓ ఎలన్ - సింగర్ రిహన్న - జమైకా స్పింటర్ ఉసేన్ బోల్టు - రచయిత్రి జేకే రౌలింగ్ - అంగ్ సాన్ సూకీ - ఏంజెలా మోర్కల్ - వ్లాదిమిర్ పుతిన్ - పోప్ ఫ్రాన్సిస్ తదితరులు 'టైమ్సు' రూపొందించిన 127 మంది జాబితాలో చోటు దక్కించుకున్నారు.