సీఎంలకి మరో ఛాలెంజ్ విసిరిన ప్రధాని మోదీ!

దేశంలో ఈ మహమ్మారి వ్యాప్తి, లాక్ ‌డౌన్‌ సడలింపు, ప్రజా రవాణా, ఆర్థిక పరిస్థితుల వంటి అంశాలపై చర్చించేందుకు ప్రధాని నరేంద్ర మోడీ ఈ రోజు ‌ మరోసారి దేశంలోని అన్ని రాష్ట్రాల ముఖ్యమంత్రులతో సమావేశం నిర్వహించారు. సీఎంలతో ప్రధాని మోదీ వీడియో కాన్ఫరెన్స్‌లో మాట్లాడటం ఇది ఐదవసారి. మహమ్మారికి అడ్డుకట్టవేయడానికి లాక్ డౌన్ ను అమలు చేస్తున్నప్పటికీ కూడా ఇది కట్టడిలోకి రాకపోవడంతో ..ఈ వైరస్ కట్టడిలోకి వచ్చేవరకు రాష్ట్రాలన్నీ కలిసికట్టుగా పనిచేసి ఈ మహమ్మారిని ఎదుర్కోవాలని ఆయన పిలుపునిచ్చారు.

కాగా, ప్రధాని మోదీ మన ముందు ప్రస్తుతం కరోనా అనే ఛాలెంజ్ ఉందని ఆసక్తికర వ్యాఖ్యలు చేశారు. దేశంలోని గ్రామాలకు ఈ వైరస్ వ్యాపించకుండా చేయడమే తక్షణ కర్తవ్యం అని చెప్పారు. పలు రాష్ట్రాలు కరోనా కట్టడి కోసం తీసుకుంటున్న చర్యలను మోదీ అభినందించారు. ఈ వీడియో కాన్ఫరెన్స్ లో తెలుగు రాష్ట్రాల ముఖ్యమంత్రులు పాల్గొన్నారు. ప్రధాని మోదీ మరోసారి లాక్ డౌన్ ను పొడించటానికే మొగ్గు చూపారని తెలుస్తోంది. అయితే కేంద్రం మూడో విడత లాక్ డౌన్ అనంతరం ప్రజా రవాణాకు గ్రీన్ సిగ్నల్ ఇవ్వనుందని తెలుస్తోంది. దేశీయ విమాన ప్రయాణాలకు కేంద్రం అనుమతులు ఇచ్చే అవకాశం ఉందని తెలుస్తోంది.

అలాగే ఈ వీడియో సమావేశంలో కాన్ఫరెన్స్‌లో బెంగాల్ ముఖ్యమంత్రి మమత బెనర్జీ కేంద్రంపై సంచలన ఆరోపణలు చేశారు. కరోనాను అడ్డం పెట్టుకుని మోదీ నేతృత్వంలోని కేంద్ర ప్రభుత్వం రాజకీయాలు చేస్తోందని తీవ్రంగా మండిపడినట్లు సమాచారం. ఈ క్లిష్ట సమయంలో ఓ స్క్రిప్ట్‌ను ముందే సిద్ధం చేసుకొని అందుకు అనుగుణంగా రాష్ట్రాలను మార్చుకుంటోందని తీవ్రంగా ఆరోపించారు అని తెలుస్తుంది. ప్రస్తుతం ఈ సమావేశం కొనసాగుతోంది.