బాబుది ‘గల్లా’పెట్టే..వైసీపీది ప్రజాబ్యాలెట్

గుంటూరు వైసీపీ ఎంపీ అభ్యర్థి మోదుగుల వేణుగోపాల్ రెడ్డి చంద్రబాబుపై నిప్పులు కురిపించారు. చంద్రబాబు ‘గల్లా’ పెట్టెను నమ్ముకున్నారని.. వైఎస్ జగన్ ప్రజల బ్యాలెట్ పెట్టెను నమ్ముకున్నారని విమర్శించారు. గుంటూరు జిల్లా తాడికొండలో షర్మిల ప్రచార సభలో మోదుగుల మాట్లాడారు. తాడికొండ వైసీపీకి బంగారు కొండ అని అన్నారు. గల్లా జయదేవ్ కు గుంటూరు ఓట్లు కావాలని పెట్టుబడులు మాత్రం చిత్తూరుకు తరలిస్తారని విమర్శించారు. గుంటూరు ఎంపీ బరి స్థానికులకు.. స్థానికేతరుడికి మధ్య జరుగుతోందని.. ఓట్లు వేసి గెలిపించాలని మోదుగుల ప్రజలను కోరారు.

గల్లా జయదేవ్ కు కనీసం గుంటూరు సరిహద్దులు తెలియవని మోదుగుల విమర్శలు గుప్పించారు. చిత్తూరు ఏందిరో వారి పీకుడేందిరో అంటూ ప్రజల్లో ఉత్సాహం నింపారు.

ఇక లోకేష్ బాబుపై సైతం మోదుగుల విమర్శలు గుప్పించారు. అతడికి ఎన్నికలు ఎప్పుడో కూడా తెలియదని.. అలాంటి వారు అసెంబ్లీలో అవసరమా అని దుయ్యబట్టారు. లోకేష్ కు జయంతికి, వర్ధంతికి తేడా తెలియదని మోదుగుల విమర్శించారు. మాజీ మంత్రి వివేకానందరెడ్డి మృతి చెందితే పరవశించి పోయాడనే దద్దమ్మ లోకేష్ అంటూ మోదుగుల విమర్శలు గుప్పించారు.

జగన్ అధికారంలోకి వస్తే రైతులకు అన్ని విధాలా మేలు చేస్తారని.. దళితులకు, ముస్లింలకు రాజన్న ఎంతో చేశాడని.. అంతకంటే ఎక్కువగానే జగన్ అధికారంలోకి వస్తే చేస్తారని చెప్పారు. వైఎస్ఆర్ రాజ్యం రావాలంటే వైసీపీని అధికారంలోకి తీసుకురావాలని కోరారు.