అంతే సంగతులు.. చంద్రబాబు చిత్తగించవలెను

వచ్చే ఎన్నికల్లో టీడీపీ గెలుపుపై ఆ పార్టీ ఎమ్మెల్యేలే కొందరు అనుమానాలు వ్యక్తంచేస్తున్నారు. కొద్ది రోజుల క్రితం చంద్రబాబు ప్రవేశపెడుతున్న చంద్రన్న బీమా లాంటి పథకాలు వేస్ట్ అని వ్యాఖ్యానించిన ఎమ్మెల్యే మోదుగుల వేణుగోపాల్ రెడ్డి తాజాగా వచ్చే ఎన్నికల్లో టీడీపీ పరిస్థితిపై ఆందోళన వ్యక్తం చేశారు. పరిస్థితి ఇలాగే ఉంటే వచ్చే ఎన్నికల్లో టీడీపీకి పరాజయం తప్పదని అన్నారు. ప్రజాభిమానాన్ని చూరగొనకపోతే అంతే సంగతులని వ్యాఖ్యానించారు.

గుంటూరు నగర పాలెం ఇరిగేషన్ బంగ్లాలో మీడియాతో మాట్లాడిన ఆయన… ప్రభుత్వం కళ్లు తెరుచుకుని పనిచేయాల్సిన అవసరం ఉందన్నారు. పార్టీలో అంతర్గత ఇబ్బందులు చాలా ఉన్నాయన్నారు. అయినప్పటికీ వాటిని దిగమింగుకుని తాను పనిచేస్తున్నానని చెప్పారు. మంత్రి పదవి రాకపోయినా ఓర్చుకుని పనిచేస్తున్నానన్నారు.

సీనియర్ నాయకుడైన మోదుగుల వ్యాఖ్యలు ఇప్పుడు గంటూరు జిల్లా టీడీపీలో చర్చనీయాంశమయ్యాయి. నిజానికి మోదుగుల గతంలో పార్లమెంట్‌కు ప్రాతినిధ్యం వహించారు. తీరా ఎన్నికల సమయంలో రాయపాటి సాంబశివరావు కాంగ్రెస్‌ నుంచి టీడీపీలోకి జంప్‌ చేయడంతో నరసరావుపేట ఎంపీ స్థానాన్ని మోదుగులకు కాకుండా రాయపాటికి ఇచ్చారు. మోదుగులకు గుంటూరు ఎమ్మెల్యే టికెట్‌ ఇచ్చారు. టీడీపీ అధికారంలోకి వస్తే మంత్రి పదవి ఇస్తానని చంద్రబాబు హామీ ఇచ్చారు. అయితే టీడీపీ అధికారంలోకి వచ్చాక మోదుగులను పక్కనపడేశారు. గతంలో ఎంపీ హోదాలో సింహంలా బతికిన తాను ఇప్పుడు జీరో అయిపోయానని ఆ మధ్య టీడీపీ కార్యకర్తల సమావేశంలోనే మోదుగుల బహిరంగంగా అసంతృప్తి వ్యక్తం చేశారు.

Like Us on Facebook : https://www.facebook.com/Tupakidotcom/