స్టాలిన్ సీఎం కావాలని మోహన్ బాబు ఆకాంక్ష!

తెలుగు, తమిళ రాష్ట్రాల్లో సినీ - రాజకీయ కుటుంబాలతో మంచి పరిచయాలున్న మోహన్ బాబు తాజాగా తమిళనాడు నేత స్టాలిన్‌ ను కలిసి ఆయన మనసుకు నచ్చిన మాట చెప్పి వచ్చారు. స్టాలిన్‌ ను తమిళనాడు ముఖ్యమంత్రిగా చూడాలని ఉందంటూ వ్యాఖ్యానించారు. కోయంబత్తూరులో దివంగత కరుణానిధి సంస్మరణ కార్యక్రమం నిర్వహించగా - దానికి స్టాలిన్ నుంచి మోహన్ బాబుకు ఆహ్వానం అందింది.

కరుణానిధితో - ఆయన కుటుంబంతో మోహన్ బాబుకు మంచి స్నేహం ఉంది. తమిళనాడులో తెలుగు సినీ పరిశ్రమ ఉన్నప్పటి నుంచే కరుణతో మోహన్ బాబుకు పరిచయం ఉంది. ఫిలిం ఇండస్ట్రీ హైదరాబాదుకు తరలి వచ్చిన తర్వాత కూడా ఇద్దరి మధ్య అనుబంధం కొనసాగింది. మోహన్ బాబు సినిమా కార్యక్రమాలకు కూడా కరుణ హాజరైన సందర్భాలు ఉన్నాయి.

కాగా ఆదివారం కోయింబత్తూరులో నిర్వహించిన కరుణానిధి సంస్మరణ సభలో స్టాలిన్‌ ను కలిసిన ఫొటోను మోహన్ బాబు ట్విటర్‌ లో పోస్ట్ చేశారు. అయితే.. తమిళ రాజకీయాల్లో అడుగుపెడుతున్న రజినీకాంత్ మోహన్ బాబుకు మరింత సన్నిహితుడు. కానీ, ఇంతవరకు రజినీ రాజకీయ ప్రవేశంపై మోహన్ బాబు ఏమీ మాట్లాడలేదు. ఇప్పుడిలా రజినీ రాజకీయ సిద్ధాంతానికి కాస్త దూరంగానే ఉన్న డీఎంకే నేతను సీఎంగా చూడాలని ఉందని మోహన్ బాబు చెప్పడం అందరినీ ఆశ్చర్యపరుస్తోంది.