ఆ కోతి అందరినీ భయపెట్టేసింది

ఉత్తర ప్రదేశ్ లోని బరేలీలో ఒక కోతి బస్సును నడిపి రోడ్డు మీద జనాలను భయభ్రాంతులకు గురి చేసింది. ఫిలిబిత్ కు చెందిన ఉత్తరప్రదేశ్ రాష్ట్ర రోడ్డు రవాణా సంస్థ బస్సును బరేలీలో ప్రయాణికుల కోసం రోడ్డు పక్కన నిలిపివేశారు. దాదాపు అరగంట సేపు ఆ బస్సు అక్కడే నిలిపి ఉంచారు. బస్సు బయలుదేరడానికి మరి కొంత సమయం ఉందని భావించిన ఆ బస్సు డ్రైవర్ కిందకి దిగాడు.

అంతే.... డ్రైవరు ఇలా దిగాడో లేదో వెంటనే ఓ కోతి డ్రైవింగ్ సీట్లో కూర్చుంది. అక్కడితో ఆగకుండా బస్సును స్టార్ చేసింది కూడా. దీంతో కంగారు పడిన డ్రైవర్ వెంటనే క్యాబిన్ లోకి వచ్చి కోతిని తరిమేశాడు. ఆ స్వల్ప వ్యవధిలోనే కోతి బస్సును రెండోగేరులోకి మార్చి కదిలించింది. హారన్ కొడుతూ ముందుకు ఉరికించింది. డ్రైవర్ దాన్ని తరమడంతో వెంటనే కిందకు దూకేసింది. బస్సును డ్రైవర్ తన నియంత్రణలోనికి తీసుకువచ్చే లోపులోనే అది రెండు వాహనాలను ఢీకొంది. పెద్ద ప్రమాదం తప్పడంతో అందరూ ఊపిరి పీల్చుకున్నారు.