'#మీ టూ' పై బీజేపీ ఎంపీ వివాదాస్ప‌ద వ్యాఖ్య‌లు!

త‌మ‌పై హాలీవుడ్ నిర్మాత‌ హార్వీ వీన్ స్టీన్ లైంగిక వేధింపుల‌కు, అత్యాచారాల‌కు పాల్ప‌డ్డాడ‌ని హాలీవుడ్ న‌టీమ‌ణులు ప్రారంభించిన `#మీ టూ`ఉద్య‌మం కొద్ది నెల‌ల క్రితం ప్ర‌పంచ‌వ్యాప్తంగా పెను ప్ర‌కంప‌న‌లు రేపిన సంగ‌తి తెలిసిందే. తాజాగా బాలీవుడ్ న‌టుడు నానా ప‌టేక‌ర్ పై న‌టి త‌నూ శ్రీ ద‌త్తా చేసిన ఆరోప‌ణ‌ల‌తో `# మీటూ` ఉద్య‌మం మ‌రోసారి వార్త‌ల్లో నిలిచింది. ప్ర‌స్తుతం కంగ‌నాతో స‌హా ప‌లువురు బాలీవుడ్ న‌టీన‌టులు త‌నూకు మ‌ద్ద‌తుగా నిలుస్తున్నారు. త‌మ‌కు ఎదురైన చేదు అనుభ‌వాల‌ను వెల్ల‌డించేందుకు ముందుకు వ‌స్తున్నారు. ప్ర‌స్తుతం దేశంలో చ‌ర్చ‌నీయాంశ‌మైన `#మీటూ` ఉద్య‌మంపై బీజేపీ ఎంపీ ఒక‌రు సంచ‌ల‌న వ్యాఖ్య‌లు చేశారు. ఈ ఉద్యమం వల్ల చాలా మంది పురుషుల జీవితాలు నాశనమ‌వుతున్నాయని బీజేపీ ఎంపీ ఉదిత్‌ రాజ్‌ వివాదాస్పద వ్యాఖ్య‌లు చేశారు.

లైంగిక వేధింపులు జరిగాయనే విషయాన్ని తాను కూడా ఒప్పుకుంటాని, అది మగవాడి స్వభావమ‌ని ఉదిత్ రాజ్ షాకింగ్ కామెంట్స్ చేశారు. మ‌రోవైపు, ఈ వేధింపుల వ్య‌వ‌హారంలో మహిళలు సరిగ్గానే ఉన్నారా అని ఆయ‌న ప్ర‌శ్నించారు. ఈ ఉద్యమాన్ని వారు తప్పుగా వాడుకోవడం లేదా..? అని అడిగారు. ఈ ఉద్య‌మాన్ని అడ్డం పెట్టుకుని ఒక్కో పురుషుడి నుంచి 2 - 4 లక్షల రూపాయలను మ‌హిళ‌లు వసూలు చేస్తున్నారంటూ వివాదాస్ప‌ద వ్యాఖ్య‌లు చేశారు. ఆ డబ్బు చేతికి రాగానే మరో మగవాడిపై ఆరోప‌ణ‌లు చేస్తున్నారంటూ బాధ్య‌తారాహిత్యంగా వ్యాఖ్యానించారు. లైంగిక వేధింపులు, రేప్ జ‌రిగిన ప‌దేళ్ల‌కు మీడియా ముందుకు రావ‌డం ఏమిట‌ని ప్ర‌శ్నించారు. అందుకే, ఈ ఉద్యమం పురుషుల జీవితాన్ని నాశనం చేస్తుంద‌ని ఆయ‌న ఇష్టారీతిలో మాట్లాడారు.

బీజేపీ నేత‌లు - ఎంపీలు - ఎమ్మెల్యేలు - సీఎంలు ఈ త‌ర‌హాలో బాధ్య‌తారాహిత్యంగా వ్యాఖ్యానించ‌డం కొత్తేం కాద‌ని ప్ర‌జ‌లు అభిప్రాయ‌ప‌డుతున్నారు. బాధ్య‌త‌గా వ్య‌వ‌హ‌రించాల్సిన ప్ర‌జా ప్ర‌తినిధులే ఇటువంటి దిగ‌జారుడు వ్యాఖ్య‌లు చేయ‌డం సిగ్గుచేట‌ని ప్ర‌జ‌లు మండిప‌డుతున్నారు. ఈ త‌ర‌హా ఘ‌ట‌న‌లపై స్పందించి నిందితుల‌ను క‌ఠినంగా శిక్షించాల్సిన అధికార పార్టీ నేత‌లే...ఈ ర‌కంగా మ‌హిళ‌ల‌ను చుల‌క‌న చేసి మాట్లాడ‌డం ఏమిటని ప్ర‌జ‌లు ప్ర‌శ్నిస్తున్నారు. స్త్రీల‌ను అమితంగా గౌర‌విస్తామ‌ని గొప్ప‌లు చెప్పే బీజేపీ నేత‌లు ఇటువంటి చౌక‌బారు వ్యాఖ్య‌లు చేయ‌డం మానుకోవాల‌ని అంటున్నారు.