రోహిత్ భార్య‌పై ధోనీ ఫ్యాన్స్ ఫైర్‌..వేడెక్కిన ఐపీఎల్

ఐపీఎల్ సీజ‌న్‌-11 వేడెక్కింది. ముంబై ఇండియన్స్‌ - చెన్నై సూపర్‌ కింగ్స్‌ ల మ్యాచ్‌ తో సీజ‌న్ ఓ వైపు అంద‌రిలో కొత్త ఉత్సాహాన్ని రేకెత్తిస్తుండ‌గా...మ‌రోవైపు ఈ మ్యాచ్‌ కు ముందే ఇరు జట్ల కెప్టెన్లు అయిన మహేంద్ర సింగ్‌ ధోని - రోహిత్‌ శర్మ అభిమానుల మధ్య సోషల్‌ మీడియా వేదికగా గొడవ మొదలై ర‌చ్చ ర‌చ్చ‌గా మారుతోంది. దీంతో మ్యాచ్‌ లో ప్లేయ‌ర్ల కంటే...అభిమానుల‌ వార్ ఆస‌క్తిక‌రంగా మారింది. రోహిత్‌ శర్మ భార్య రితికా సజ్దే ఇన్‌ స్టాగ్రామ్‌ లో చేసిన ఓ పోస్ట్ ఆధారంగా ఆగ్ర‌హం వ్య‌క్తం చేస్తూ ధోనీ ఫ్యాన్స్ ఆమెను ట్రోల్ చేస్తున్నారు.

ఓ మ్యాగ‌జైన్ రోహిత్ శ‌ర్మ కెప్టెన్ కూల్ అని ముఖ‌చిత్రంపై అచ్చు వేసింది. దాన్ని రోహిత్ శ‌ర్మ భార్య పోస్ట్ చేయ‌డంతో ధోనీ ఫ్యాన్స్ భ‌గ్గుమ‌న్నారు. కెప్టెన్ కూల్ అంటే ధోనీ ఒక్క‌రేన‌ని ప్ర‌స్తావిస్తూ...కొంద‌రు శాంతియుతంగా కొంద‌రు ఆగ్ర‌హంగా స్పందిస్తున్నారు. కెప్టెన్ కూల్ అంటే ధోనీ ఒక్క‌రేన‌ని పేర్కొంటూ...ఆ పేరును రోహిత్ శ‌ర్మ‌కు పెట్ట‌వ‌ద్ద‌ని ప‌లువురు విజ్ఞప్తి చేశారు. ఇంకొంద‌రు ఫ్యాన్స్ ఫైర‌వుతూ `రితికా...కెఫ్టెన్ కూల్ అనే టైటిల్ కోసం అడుక్కోకు ` అంటూ త‌మ‌దైన శైలిలో సెటైర్లు వేశారు.

అయితే తాము కూడా ఏం త‌క్కువ తిన‌లేద‌ని రోహిత్ ఫ్యాన్స్ సైతం ఈ సోష‌ల్ మీడియా వార్‌లోకి ఎంట్రీ ఇచ్చారు. రోహిత్ ఖ‌చ్చితంగా మిస్ట‌ర్ కూల్ కెప్టెన్ అని ఢంకా భ‌జాయిస్తున్నారు. ఐపీఎల్‌ లో ముంబైని మూడు సార్లు చాంపియన్‌గా నిలిపిన రోహిత్‌ శర్మ మిస్ట‌ర్ కూల్ కాక మ‌రేం అవుతార‌ని వారు ప్ర‌శ్నిస్తున్నారు. ఆయ‌న కెప్టెన్సీ కూడా హుందాగా, కూల్‌గా ఉంటుందంటూ రోహిత్ భార్య రితిక‌కు మ‌ద్ద‌తు ఇస్తున్నారు. ఇలా రోహిత్ ఫ్యాన్స్‌, ధోనీ ఫ్యాన్స్ మ‌ధ్య సోష‌ల్ వార్ జ‌రుగుతున్న‌ప్ప‌టికీ....రోహిత్ సతీమ‌ణి రితికా మాత్రం స్పందించ‌క‌పోవ‌డం కొస‌మెరుపు.