అసెంబ్లీకి అందాల తార

త‌మిళ‌నాడులో సినీతార‌ల‌కు ఉండే క్రేజ్ ఎంతో ప్ర‌త్యేకంగా చెప్పాల్సిన అవ‌స‌రం లేదు. సినిమాల్లోనే కాదు.. రాజ‌కీయాల్లోనూ వారికి ఆద‌ర‌ణ ఎక్కువే. వెండితెర వేల్ప‌ల ప‌ట్ల విప‌రీత‌మైన అభిమానాన్ని ప్ర‌ద‌ర్శించే త‌మిళుల మ‌న‌సుల్ని దోచుకునేందుకు పెద్ద ఎత్తున ఇప్ప‌టికే రాజ‌కీయాల్లోకి వ‌చ్చేశారు. తాజాగా ఆ జాబితాలో ఉత్త‌రాది భామ న‌గ్మా రెఢీ అవుతోంది.

త‌న అంద‌చందాల‌తో ఒక ఊపు ఊపేసిన న‌గ్మా.. ఆ మ‌ధ్య కాంగ్రెస్ లో చేర‌ట‌మే కాదు.. పార్టీలో త‌న స్థానాన్ని సుస్థిరం చేసుకునేందుకు విప‌రీతంగా క‌ష్ట‌ప‌డుతుంద‌న్న మాట వినిపిస్తోంది. పార్టీలో చేరిన కొద్ది కాలానికే అఖిల భార‌త మ‌హిళా కాంగ్రెస్ ప్ర‌ధాన కార్య‌ద‌ర్శి స్థాయికి చేరుకొని త‌న స‌త్తా ఏమిటో చాటారు. త‌మిళ రాజ‌కీయాల మీద ఫోక‌స్ చేసిన అమ్మ‌డు.. మ‌రికొద్ది నెల‌ల్లో జ‌రిగే త‌మిళ‌నాడు అసెంబ్లీ ఎన్నిక‌ల్లో పోటీ చేయాల‌ని త‌హ‌త‌హ‌లాడుతున్నారు.

చెన్నై మ‌హాన‌గ‌రం బ‌రి నుంచి దిగాల‌ని భావిస్తున్న ఆమెకు.. మ‌రో న‌టి.. త‌మిళ‌నాడు కాంగ్రెస్ మ‌హిళా నేత క‌మ్ న‌టి కుష్బూ పోటీ ప‌డుతున్నారు. నిజానికి ఇద్ద‌రిలో కుష్బూ కంటే న‌గ్మాకే పార్టీలో మైలేజీ ఎక్కువ‌. పార్టీలో త‌న‌కున్న ప‌ర‌ప‌తి పుణ్య‌మా అని ఎమ్మెల్యేగా బ‌రిలోకి దిగాల‌ని భావిస్తున్న‌ట్లు చెబుతున్నారు. త‌న మ‌న‌సులోని మాట‌ను స‌మ‌యానుకూలంగా ప్ర‌స్తావించిన ఆమె.. పార్టీ అధినేత్రి సోనియ‌మ్మ కానీ ఆదేశించాలే కానీ త‌మిళ‌నాడులోని అసెంబ్లీ స్థానం నుంచి తాను బ‌రిలోకి దిగుతాన‌ని న‌గ్మా తాజాగా పేర్కొన్నారు. మ‌రి.. అమ్మ ఇలాకాలో న‌గ్మాకు అసెంబ్లీ సీటును కేటాయిస్తారా? లేదా? అన్న‌ది కాల‌మే చెప్పాలి.