మాజీ ప్రేయసీ ప్రియులు చెరో పార్టీలో..!

భోజ్ పురీ సూపర్ స్టార్ రవి కిషన్ – ఆలిండియా లెవల్లో హీరోయిన్ గా ఒక వెలుగు వెలిగిన నగ్మా.. వీరిద్దరూ కొంత కాలం ప్రేమాయణాన్ని నడిపించారు. హీరోయిన్ గా తన కెరీర్ చరమాంకంలో ఉండగా నగ్మ భోజ్ పురి సినిమాల్లో నటించింది. అక్కడ సూపర్ స్టార్ అయిన రవి కిషన్ తో ఆమె అప్పుడు ప్రేమాయణాన్ని నడిపించిందనే ప్రచారాన్ని పొందింది. వీరిద్దరూ పెళ్లి చేసుకోబోతున్నట్టుగా కూడా అప్పట్లో వార్తలు వచ్చాయి.

అయితే ఎందుకో వీరు పెళ్లి పీటలు ఎక్కలేదు. ఇక సినిమాల్లో అవకాశాలు తగ్గిపోయాకా కాంగ్రెస్ పార్టీ తీర్థం పుచ్చుకుంది నగ్మా. రాహుల్ గాంధీ స్థాయిలో నగ్మాకు మంచి పలుకుబడి ఉందంటారు. ప్రత్యేకించి తమిళనాడు కాంగ్రెస్ వ్యవహారాల్లో నగ్మా కొంత హడావుడి చేసింది. అయితే పెద్ద పదవులు ఏవీ పొందలేకపోయింది.

ఈ ఎన్నికల్లో కూడా నగ్మా కాంగ్రెస్ పార్టీ తరఫున పని చేస్తూ ఉంది. ఇంతలోనే ఆమె మాజీ ప్రియుడు బీజేపీ తరఫున ఎంపీ టికెట్ పట్టేశారు. గోరఖ్ పూర్ నుంచి ఆయన ఎంపీగా పోటీకి దిగుతున్నారు.

రవి కిషన్ కూడా గతంలో కాంగ్రెస్ పార్టీ లో పని చేసిన వ్యక్తే. కొన్నేళ్ల కిందట ఆయన కాంగ్రెస్ లో చేరారు. ఇప్పుడు మాత్రం ఆ పార్టీకి దూరం అయ్యి - బీజేపీ తరఫున ఎంపీగా పోటీ చేస్తూ ఉన్నారు. నగ్మా ఎన్నికల బరిలోకి దిగకపోయినా కాంగ్రెస్ తరఫున కొనసాగుతూ ఉన్నారు. రవి కిషన్ మాత్రం బీజేపీ తరఫున పోటీకే దిగారు. ఈ మాజీ ప్రేయసీ ప్రియుడు చెరో పార్టీకి చేరారు ఇలా!