లోకేష్ కు సీటు ఖరారు..! ఇదైనా ఖాయమేనా?

ఏపీ మంత్రి నారా లోకేష్ బాబుకు ప్రత్యక్ష ఎన్నికల విషయంలో సీటును ఖరారు చేశారట తెలుగుదేశం అధినేత చంద్రబాబు నాయుడు. లోకేష్ పోటీ విషయంలో ఇప్పటి వరకూ చాలా కసరత్తు సాగిన సంగతి తెలిసిందే. ఈ నేపథ్యంలో.. చాలా నియోజకవర్గాల పేర్లు వినిపించాయి. వాటిల్లో.. ఇటీవలి అప్ డేట్ భీమిలి.

భీమిలి నుంచి లోకేష్ పోటీ చేయబోతున్నట్టుగా తెలుగుదేశం వర్గాలు మీడియాకు లీకు ఇచ్చాయి. భీమిలి నుంచి లోకేష్ పోటీ ఖరారు అయినట్టుగా ప్రచారం జరిగింది. అయితే ఏమైందో ఏమో కానీ.. ఇప్పుడు భీమిలి విషయంలో లోకేష్ డ్రాప్ అయ్యారట.

భీమిలి నియోజకవర్గంలో టీడీపీ తరఫు నుంచి మాజీ ఐపీఎస్ అధికారి లక్ష్మినారాయణ పేరు వినిపిస్తూ ఉంది. అయితే అది కూడా ఖరారు కాలేదు. కేవలం ప్రచారం మాత్రమే సాగుతూ ఉంది.

ఇక లోకేష్ బాబు విషయంలో టీడీపీ కొత్త లీక్ ఇచ్చింది. ఆయనకు చంద్రబాబు నాయుడు టికెట్ ఖరారు చేశారట. ఏ నియోజకవర్గం నుంచి అంటే.. విశాఖపట్టణం నార్త్! విశాఖలోని ఉత్తర నియోజకవర్గం నుంచి లోకేష్ పోటీ చేయనున్నట్టుగా చంద్రబాబు నాయుడు పార్టీ వర్గాలతో వ్యాఖ్యానించినట్టుగా - మీడియాకు లీకులు అందుతూ ఉన్నాయి. అయితే అధికారికంగా ప్రకటన ఏమీ లేదు.

లోకేష్ విషయంలో ఇప్పటికే పలు నియోజకవర్గాల పేర్లు వినిపించడంతో.. దేన్ని నమ్మాలో, దేన్ని నమ్మకూడదో అర్థం కాని పరిస్థితే నెలకొని ఉంది. ప్రస్తుతానికి అయితే విశాఖ నార్త్ అనేది తెలుగుదేశం పార్టీ వర్గాలు ఇస్తున్న సమాచారం. అధికారిక జాబితా వస్తే.. ఖరారు అయినట్టే అనుకోవాలి.