మోడీ రాముండంటున్న జ‌శోదాబెన్‌

ప్ర‌ధాన‌మంత్రి న‌రేంద్ర మోడీ వివాహం మ‌రోమారు తెర‌మీద‌కు వ‌చ్చింది. మోడీ ఒక‌నాటి క్యాబినెట్ స‌హ‌చ‌రురాలు చేసిన కామెంట్ల‌తో...ప్రధాని నరేంద్ర మోడీ భార్య జశోదాబెన్ తెర‌మీద‌కు రావాల్సి వ‌చ్చింది. గుజ‌రాత్ మాజీ ముఖ్య‌మంత్రి ప్ర‌స్తుతం మధ్యప్రదేశ్ గవర్నర్‌గా ఉన్న‌ ఆనందీబెన్ పటేల్ ఓ కార్యక్రమంలో మాట్లాడుతూ.. నరేంద్ర మోడీకి వివాహం కాలేదు. ఆయనకు భార్య - పిల్లలు లేనప్పటికీ.. మహిళలను - పిల్లల బాధను అర్థం చేసుకోగలరని ఆమె వ్యాఖ్యానించారు. ఈ వ్యాఖ్యలపై జ‌శోదాబెన్ తీవ్ర విచారం వ్యక్తం చేశారు. నరేంద్ర మోడీకి పెళ్లికి కాలేదని ఆనందీబెన్ చెప్పడం సరికాదన్నారు. ఆనందీబెన్ వ్యాఖ్య‌లు త‌న‌ను తీవ్ర కలత చెందించాయ‌ని జశోదాబెన్ వ్యాఖ్యానించారు.

ఓ టీవీ చాన‌ల్‌ తో జ‌శోదాబెన్ మాట్లాడుతూ ``మోడీ బాధ్యతయుతమైన వ్యక్తి అని.. ఆయన తనకు రాముడు లాంటి వ్యక్తి. 2004 లోక్‌ సభ ఎన్నికల్లో మోడీనే స్వయంగా తనను పెళ్లి చేసుకున్నట్లు నామినేషన్‌ లో తెలిపారు.`` అనిజశోదాబెన్ గుర్తు చేశారు. ఉన్నత విద్యావంతురాలైన ఆనందీబెన్ ఇలాంటి వ్యాఖ్యలు చేయడం బాధాకరమన్నారు. నరేంద్ర మోడీకి పెళ్లైందని అందరికీ తెలుసు, అయినా జనం అబద్ధాలు ప్రచారం చేస్తున్నారు అని జశోదాబెన్ కలత చెందారు. ఆనందీబెన్ మాటలు పూర్తిగా అవాస్తవం అని జశోదాబెన్ - ఆమె కుటుంబ సభ్యులు చెబుతున్నారు. కాగా, మోడీ ప్రధాని పీఠం అధిరోహించడానికి కొన్ని రోజుల ముందే ఆయన భార్య జ‌శోదాబెన్‌ పటేల్‌ గురించి అన్ని టీవీ చానెల్స్‌లో ప్రచారం జరిగింది. ఆ సమయంలో కొన్ని టీవీ చానెల్స్‌ యశోదాబెన్‌ను ఇంటర్వ్యూ కూడా చేశాయి. ఆ సమయంలో జ‌శోదాబెన్‌ తనకు, మోడీకి వివాహం అయ్యిందని కానీ వృత్తిపరమైన బాధ్యతల వల్లే తాము వేర్వేరుగా ఉంటున్నామని కూడా యశోదాబెన్ తెలిపారు.