సభలో ఆ నినాదాలు..అభ్యంతరం వ్యక్తం చేసిన ఎంపీ కమ్ హీరోయిన్!

నవనీత్ కౌర్.. తెలుగు సినీ ప్రియులకు కొద్దో గొప్పో పరిచయం ఉన్న నటీమణే. పలు తెలుగు సినిమాల్లో గ్లామరస్ పాత్రలు చేశారీమె. ఆ తర్వాత ఒక రాజకీయ కుటుంబం వ్యక్తిని పెళ్లి చేసుకుని సెటిలయ్యారు. తను కూడా ప్రత్యక్ష రాజకీయాల వైపు వచ్చారు.

ఈ సారి లోక్ సభ సార్వత్రిక ఎన్నికల్లో ఆమె ఎంపీగా కూడా విజయం సాధించి సభలోకి ఎంటరయ్యారు. ఆ విషయాన్ని సౌత్ మీడియా ప్రముఖంగా ప్రచారం చేసి పెట్టింది. ఇక సభలో కూడా నవనీత్ కౌర్ తన తీరుతో వార్తల్లోకి వస్తున్నారు.

లోక్ సభలో కొత్తగా ఎన్నికైన ఎంపీల ప్రమాణ స్వీకారాలు కొనసాగుతూ ఉన్న సంగతి తెలిసిందే. ఈ సందర్భంగా కొంతమంది భారతీయ జనతా పార్టీ ఎంపీలు నినాదాలు చేస్తూ ఉన్నారు. తమకు అచ్చి వచ్చిన 'జై శ్రీరామ్' నినాదాలు చేస్తూ ఉన్నారు కమలం పార్టీ ఎంపీలు.

లోక్ సభలో ఈ నినాదాల పట్ల నవనీత్ కౌర్ స్పందించింది. అలాంటి నినాదాలు చేయడానికి దేవాలయాలు ఉన్నాయని - అక్కడ ఆ నినాదాలు చేస్తే మంచిదని - లోక్ సభలో ఆ నినాదాలు ఏమిటని నవనీత్ కౌర్ అభ్యంతరం చెబుతోంది. అయినా బీజేపీ రాజకీయం అంతా ఆ నినాదంతోనే ముడిపడి ఉంది కదా. ఆ విషయం ఈ ఎంపీకి తెలియనిది అయ్యుంటుందా!