‘అమరావతి’ బస్సులో ఫ్లైట్ జర్నీ అనుభూతి

విమానయానంలో ఉండే సౌకర్యం బస్సు ప్రయాణంలో ఉంటే ఆ సుఖమే వేరు. అలాంటి సుఖాన్ని అందించే ప్రయత్నం చేసింది ఏపీఎస్ ఆర్టీసీ. ఏపీ ఆర్టీసీలో అత్యంత విలాసవంతమైన బస్సుగా పేరున్న ‘అమరావతి’ బస్సులో వినూత్న సేవల్ని అందించనున్నారు. దూర ప్రయాణాలకు వెళ్లే ప్రయాణికులకు ఇబ్బంది లేకుండా ఉండటంతో పాటు.. మరింత సౌకర్యవంతంగా ఉండేలా ప్రతి సీటుకు ఒక స్క్రీన్ ను ఏర్పాటు చేశారు.

బస్సులో సినిమాలు వేయటం మామూలే అయినా.. అవి సరిగా ప్లే కాకపోవటం.. ముందు సీట్లో ఉన్న వారు తమ సీటును సరిగా ఉంచుకోకపోతే ఇబ్బందికరంగా ఉంటుంది. అలాంటి వాటికి చెక్ చెబుతూ.. ఏ ప్రయాణికుడికి ఆ ప్రయాణికుడు తనకు నచ్చిన ఛానల్.. సినిమా చూసుకునే సౌకర్యం కల్పిస్తూ వినూత్న ప్రయోగం చేసింది ఏపీ ఆర్టీసీ.

సీటుతో స్ర్కీన్ తో పాటు.. ఎవరికి వారికి ఒక రిమోట్ ఇస్తూ.. ఎవరికి వారు తమకు నచ్చిన కార్యక్రమాల్ని చూసుకునే వీలు కల్పించింది. తాజాగా ఈ తరహా సేవల్ని 80 అమరావతి బస్సుల్లో అందించనున్నారు. విలాసవంతమైన విమానాల్లో ఇదే తరహాలో సౌకర్యం ఉంటుంది. ఇప్పుడు అలాంటి సౌకర్యం బస్సులో ఏర్పాటు చేయటం ఏపీ ఆర్టీసీ స్పెషాలిటీగా చెప్పొచ్చు. మరి.. దీనికి ప్రయాణికుల ఆదరణ ఎలా ఉంటుందో చూడాలి.