పెద్ద సారు చెబితే నమ్మలేదు కదా.. కలియుగాంతమే.. ఇంగ కష్టమే బతుకుడు!

సోషల్ మీడియా వచ్చాక.. వాట్సాప్ యూనివర్సిటీ పాపులర్ అయ్యాక.. ఎవరికి వారు తమకున్న టాలెంట్ చూపిస్తున్నారు. వారి దెబ్బకు.. ప్రొఫెషనల్స్ సైతం ఆశ్చర్యపోయి.. అవాక్కు అయిపోతున్న పరిస్థితి. ఏదైనా పరిణామం చోటు చేసుకున్నంతనే.. ఈ ‘సోషల్’ జనాలు ఒళ్లు విరుచుకొని స్పందిస్తున్న తీరు మామూలుగా ఉండట్లేదుప వీరి దెబ్బకు తోపు ప్రముఖులు సైతం గింగిరాలు తిరిగిపోయే పరిస్థితి.

తాజాగా తెలంగాణ రాష్ట్ర ముఖ్యమంత్రి ప్రపంచమే అదిరేలా.. ప్రపంచ నాయకులు సైతం ఒక్కసారి ఉలిక్కిపడే మాటలు మాట్లాడటం తెలిసిందే. తెలంగాణ మీద పెద్ద కుట్ర జరుగుతోందని.. క్లౌడ్ బరస్ట్ తో భారీగా వర్షాలు కురిపించేసి.. వరదలు పారేలా చేస్తున్న వైనాన్ని మీడియా ముందు చెప్పేసిన వైనం ఇప్పుడు ఆసక్తికరంగానే కాదు హాట్ టాపిక్ గా మారింది.

కేసీఆర్ మాటల దెబ్బకు ఎవరికి వారు క్లౌడ్ బరస్ట్.. క్లౌడ్ సీడింగ్ లాంటి పదాలకు సరైన అర్థాలతో పాటు.. గూగులమ్మలో దీనికి సంబంధించిన విశేషాలు ఏమేం ఉంటాయన్న విషయాల్ని శోధించి మరీ చదివేస్తున్నారు.

పెద్ద సారు చెప్పిన మాటలకు సరిపోయే వాదన ఎక్కడైనా కనిపిస్తుందేమోనని గులాబీ కారు బ్యాచ్ తెగ వెతికేస్తున్నా కనిపించి చావట్లేదట. దీంతో.. వారు ఆగమాగమైపోతున్నారు. ఓపక్క సోషల్ మీడియాలో.. వాట్సాప్ గ్రూపుల్లో పెద్ద సారును పంచ్ ల మీద పంచ్ లు వేసుకుంటున్న వేళ.. దానికి విరుగుడు వాదన ఎక్కడైనా కనిపిస్తే.. దాన్ని హైలెట్ చేయటం ద్వారా అందరి నోళ్లు మూయాలని తెగ ట్రై చేస్తున్నా ఫలితం రావట్లేదని వేదన చెందుతున్నారు.

ఇలాంటి వేళ.. ఒక వీడియో మస్తు హైలెట్ కావటమే కాదు.. కేసీఆర్ మాటలకు భలే వీడియోను వెతికి తెచ్చారుగా? అంటూ వ్యాఖ్యానం చేసేసుకుంటున్నారు. ఇంతకీ ఈ ఇరవై ఒక్క సెకన్ల వీడియోను చూస్తే.. మేఘాలు కమ్మిన ఆకాశంలో సూరీడు పొడుచుకొస్తూ.. వెలుగుల్ని చిమ్మేస్తున్న సీన్ కళ్ల ముందు కనిపిస్తుంటే.. బ్యాక్ గ్రౌండ్ లో వాయిస్ హైలెట్ గా మారింది.
‘కలియుగాంతం.. ఇదిగో మబ్బులంతా రంధ్రం పడింది.

మొత్తం రంధ్రం పడింది.. కలియుగాంతమే. పెద్ద సారు చెబితే నమ్మలేదు కదా? రౌండ్ బరస్ట్ అయ్యింది’ అంటూ ఎంతో సీరియస్ గా చెబుతున్న మాటలకు పదే పదే వీడియో చూసేలా ఉంది. ఏమైనా.. ఇలాంటి వీడియోలు.. ఫోటోలు గడిచిన రెండు రోజులుగా తెగ వైరల్ అవుతున్నాయి.