అదేంది భయ్.. మాల్యా సరుకంటే కొనట్లేదే

విలువైనది ఏది వేలం పెట్టినా.. కొనేందుకు బారులు తీరే సంపన్నులు.. లిక్కర్ కింగ్‌ గా చెప్పే విజయ్ మాల్యాకు చెందిన ఆస్తుల్ని కొనేందుకు ఒక్కరంటే ఒక్కరు కూడా ముందుకు రాని వైనం కనిపిస్తోంది. దేశానికి దాదాపు రూ.9వేల కోట్లకు పైగా అప్ప చెల్లించకుండా గుట్టుచప్పుడు కాకుండా దేశాన్ని విడిచి జంప్ అయిన‌ విజయ్ మాల్యా.. విదేశాల్లో ఉండి కూడా తన సత్తా చాటుతున్నారా?అన్న సందేహం కలిగే పరిస్థితి.

ఆయనకు చెందిన విల్లా.. విమానం.. ఇలా ఆయనకు చెందిన విలువైన ఆస్తులుగా చెబుతున్నదేదీ.. అమ్మకానికి పెడితే కొనేందుకు ఒక్కడంటే ఒక్కడు సైతం ముందుకు రాని వైనం కనిపిస్తోంది. ఇప్పటికే పలుమార్లు మాల్యా ఆస్తుల్నిఅమ్మే విషయంలో భంగపడిన బ్యాంకులకు తాజాగా అలాంటి అనుభవమే మరోసారి ఎదురైంది. గోవాలోని ఖరీదైన ఆయన విల్లాను కొనేందుకు ఒక్కరంటే ఒక్కరు కూడా ముందుకు రాని దుస్థితి.

గోవాలోని కండోలిన్ ప్రాంతంలో 12,350 చదరపు మీటర్ల విస్తీర్ణంలో ఉండే ఈ విల్లాలో నిత్యం పార్టీలతో మా గొప్ప హడావుడిగా ఉండేది. మాల్యా జామానాలో ఒక వెలుగు వెలిగిన ఈ విల్లా.. ఇప్పుడు ఎలాంటి కార్యక్రమాలు లేక చిన్నబోయింది. అంతేనా.. కోట్లాది రూపాయిల విలువైన ఈ విల్లాను అమ్మకానికి పెడితే ఒక్కడు కూడా కొనేందుకు ముందు రాలేదు. కొన్ని భవనాలు కొనుగోలు చేసేందుకు వందలాది కోట్లు పెట్టే సంపన్నులు.. మాల్యా మాల్ గా చెప్పే ఈ విల్లాను కొనుగోలు చేయటానికి రూ.85 కోట్లు ఖర్చు చేసేందుకు సైతం నో అంటే నో అన్నట్లుగా వ్యవహరించటం కనిపిస్తుంది. అదేందో కానీ.. మాల్యాకు చెందినది ఏదీ కూడా అమ్మకానికి వెళ్లిన ప్రతిసారీ ఎదురుదెబ్బ తగలటం ఏమిటో..?

Like Us on Facebook : https://www.facebook.com/Tupakidotcom/