వాళ్లంతా కలిసి 3లక్షల ఇటుకలు కొన్నారు

ఏపీ రాజధాని అమరావతి నిర్మాణం కోసం ప్రతి ఒక్క తెలుగువాడు భాగస్వామ్యం కావాలన్న ఉద్దేశ్యంతో ఏపీ ముఖ్యమంత్రి నా ఇటుక.. నా అమరావతి పేరిట ఈ ఇటుకను ఆన్ లైన్ లో కొనుగోలు చేయాలని పిలుపునివ్వటం తెలిసిందే. చంద్రబాబు పిలుపుతో ఇప్పటికే వేలాదిమంది కలిసి లక్షలాది ఇటుకల్ని కొనుగోలు చేస్తున్నారు. ఒక్కో ఇటుక ధరను రూ.10గా నిర్ణయించటం.. దీనికి అపూర్వ స్పందన వస్తోంది. తాజాగా ఏపీ ఐటీ శాఖామంత్రి పల్లె రఘునాధరెడ్డి అమెరికాలో పర్యటిస్తున్నారు. ఈ సందర్భంగా ఆయన అక్కడి ప్రవాసాంధ్రులకు అమరావతి నిర్మాణంలో పాలు పంచుకోవాలని పిలుపునిచ్చారు.

మంత్రి ఇచ్చిన పిలుపుతో.. నార్త్ అమెరికా బే ఏరియాకు చెందిన తెలుగువారు ఏకంగా 3 లక్షల ఇటుకల్ని కొనేందుకు సిద్ధమయ్యారు. ఒక్క రోజులో ఇంత భారీగా ఒకే సంఘానికి చెందిన వారు మూడు లక్షల ఇటుకల్నికొనుగోలు చేయటం ఒక రికార్డుగా చెబుతున్నారు. ఆమెరికాలోని ఒరాకిల్ ఓపెన్ వరల్డ్ సమ్మిట్ లో పాల్గొనటానికి వచ్చిన మంత్రి పల్లె.. బే ఏరియా ప్రవాసాంధ్రుల్ని తన మాటలతో భారీగా కదిలించారనే చెప్పాలి. ప్రస్తుతం.. నా ఇటుక.. నా అమరావతి కార్యక్రమం కింద 53,119 మంది 34.79లక్షల ఇటుకల్ని విరాళంగా ఇచ్చారు.