నూతన్ నాయకుడిపై రౌడీషీట్ తెరుస్తారా?

దళిత యువకుడికి శిరోముండనం కేసులో బిగ్ బాస్ సెలెబ్రెటీ, దర్శకుడు నూతన్ నాయుడుతోపాటు ఆయన భార్య పీకల్లోతు ఇరుక్కుపోయారు. ఇప్పటికే వీరిద్దరూ అరెస్ట్ అయ్యారు. భార్య ప్రియను కాపాడబోయి ఏపీ సీఎంవో కార్యదర్శి పేరుతో ఫోన్ చేసి నూతన్ కూడా ఈ కేసులో ఇరుక్కున్నాడు.

కాగా నూతన్ అరెస్ట్ కావడంతో ఇన్నాళ్లు అతడి వల్ల ఇబ్బందులు పడ్డ వారంతా ఇప్పుడు గళం విప్పుతున్న్టటు తెలుస్తోంది. తాజాగా ఓ ఫేస్ బుక్ పోస్టు వైరల్ అవుతోంది. సురేష్ ప్రొడక్షన్స్ లో నిర్మాణ వ్యవహారాలు చూసే వెంకట్ శిధారెడ్డి పెట్టిన ఫేస్ బుక్ పోస్టు నూతన బాగోతాన్ని అంతా బయటపెట్టిందని నెటిజన్లు అనుకుంటున్నారు. అలాగే ఏపీ సీఎంవో కార్యదర్శి పీవీ రమేశ్ సైతం నూతన్ తన పేరును వాడుకొని మోసం చేశాడని ట్విట్టర్ లో ఆరోపించారు. దాదాపు 30 మందికి పీవీ రమేశ్ పేరు చెప్పి పనులు చేసుకున్నాడని పోలీసులు తేల్చారు.

ఈ క్రమంలోనే పోలీసులు నూతన్ ఇంకా ఎవరినైనా మోసం చేశాడా? అన్న కోణంలో విచారణ జరుపుతున్నారు. ఇప్పటికే విశాఖలో వివిధ పోలీస్ స్టేషన్లలో నూతన్ పై 8 కేసులు నమోదైనట్టు పోలీసులు గుర్తించినట్టు సమాచారం. బాధితులు మరింతమంది వస్తున్న నేపథ్యంలో నూతన్ పై మరిన్ని కేసులు పెట్టడానికి పోలీసులు రెడీ అయ్యారు. ఈ క్రమంలోనే అతడిపై రౌడీషీట్ కూడా తెరువవచ్చు అన్న ఊహాగానాలు వ్యక్తమవుతున్నాయి. మరి దీనిపై పోలీసులు ఎలా స్పందిస్తున్నారన్నది వేచిచూడాలి.