ఢిల్లీలో బాబును క‌లిసిన ఒంటేరు.. బండ్ల‌!

ఈ మ‌ధ్య‌నే హైద‌రాబాద్‌కు వ‌చ్చారు టీడీపీ అధినేత చంద్ర‌బాబు. త‌న పార్టీ నేత‌ల‌తో భేటీ అయ్యారు. కాంగ్రెస్‌.. టీడీపీ పొత్తు నేప‌థ్యంలో ఈ రెండు పార్టీల నేత‌లు భేటీ కావ‌టం కామ‌న్ అయ్యింది. అయితే.. ఈ మ‌ధ్య‌నే హైద‌రాబాద్ వ‌చ్చిన బాబును క‌ల‌వ‌ని కాంగ్రెస్ నేత‌లు కొంద‌రు.. ఢిల్లీ ప‌ర్య‌ట‌న‌లో ఉన్న బాబును క‌ల‌వ‌టం ఆస‌క్తిక‌రంగా మారింది.

తెలంగాణ‌లో ఏపీ పోలీసులు ఓట‌ర్ల‌కు డ‌బ్బులు పంచుతున్నార‌న్న ప్ర‌చారం జోరుగా సాగ‌టం.. తాజాగా ఏపీ డీజీపీకి తెలంగాణ ఎన్నిక‌ల సంఘం అధికారి నోటీసులు ఇచ్చిన వేళ‌.. తెలంగాణ‌ కాంగ్రెస్ నేత‌లు ఒంటేరు ప్ర‌తాప్ రెడ్డి.. సినీ నిర్మాత బండ్ల గ‌ణేశ్ లు బాబును క‌ల‌వ‌టం ఆస‌క్తిక‌రంగా మారింది.

ఢిల్లీ ప‌ర్య‌ట‌న‌కు వ‌చ్చిన చంద్ర‌బాబు.. ఏపీ భ‌వ‌న్ లో ఉన్నారు. ఈ సంద‌ర్భంలో అక్క‌డికి వ‌చ్చిన ఒంటేరు.. గ‌ణేశ్ లు బాబును క‌లిశారు. తెలంగాణ రాష్ట్ర ఆప‌ద్ద‌ర్మ ముఖ్య‌మంత్రి కేసీఆర్ బ‌రిలోకి దిగుతున్న గ‌జ్వేల్ నుంచి కాంగ్రెస్ అభ్య‌ర్థిగా బ‌రిలోకి దిగ‌నున్న మాజీ టీడీపీ నేత ఒంటేరు ప్ర‌తాప‌రెడ్డి బాబును క‌ల‌వ‌టం ఆస‌క్తిక‌రంగా మారింది. తాను కేసీఆర్ పై పోటీ చేయ‌నున్న నేప‌థ్యంలో టీడీపీ అధినేత బాబు ఆశీస్సులు కోరిన‌ట్లుగా చెబుతున్నారు.

ఈసారి ఎలాగైనా కేసీఆర్ ను ఓడించాల‌న్న ప‌ట్టుద‌ల‌తో ఉన్న ఒంటేరు.. బాబుతో స‌మావేశం కావ‌టం ఇప్పుడు అంద‌రి దృష్టిని ఆక‌ర్షిస్తోంది. బాబును ఢిల్లీలో క‌లిసిన ఈ ఇద్ద‌రు నేత‌లు ఆ త‌ర్వాత ఏపీ ఆర్థిక‌మంత్రి య‌న‌మ‌ల రామ‌కృష్ణుడు.. టీడీపీ ఎంపీల‌తో కాసేపు మాట్లాడ‌టం క‌నిపించింది. ఇద్ద‌రు తెలంగాణ కాంగ్రెస్ నేత‌లు బాబును ప్ర‌త్యేకంగా క‌ల‌వ‌టం అదీ ఢిల్లీలో కావ‌టం ఆస‌క్తిక‌రంగా మారింది.