సభలో రెచ్చిపోయిన ఓవైసీ.. వీడియో వైరల్ !

అసదుద్దీన్ ఓవైసీ.. పక్కా ముస్లిం వాద పార్టీ అధినేత.. ఎప్పుడూ సీరియస్ ప్రసంగాలు చేస్తూ హిందుత్వ వాదులును, ప్రధానంగా బీజేపీ నేతలను తూర్పారపట్టే ఈయన మహారాష్ట్ర ఎన్నికల సందర్భంగా డ్యాన్స్ చేసి అందరినీ ఆశ్చర్యపరిచాడు.

మహారాష్ట్ర ఎన్నికల బరిలో ఎంఐఎం దిగింది. 44 అసెంబ్లీ సీట్లలో ఎంఐఎం అభ్యర్థులు బరిలోకి దిగారు. ఆ పార్టీ అధినేత అసదుద్దీన్ ఓవైసీ రాష్ట్రంలోని ముస్లింలు అత్యధికంగా గల ఔరంగాబాద్ లో తాజాగా ప్రచారానికి వెళ్లాడు. వారికి మద్దతుగా ఔరంగాబాద్ లోని పైథాన్ లో ఎన్నికల ర్యాలీ నిర్వహించారు. ఈ ర్యాలీలో స్టేజ్ మీద ప్రధాని నరేంద్రమోడీపై తీవ్ర స్థాయిలో విరుచుకుపడి నేతలు, కార్యకర్తల్లో ఉత్సాహం నింపారు.

"ఎన్నికల సమయంలోనే ప్రధాని మోడీ జాతీయవాదాన్ని, హిందుత్వాన్ని రెచ్చగొట్టేలా ప్రకటనలు చేస్తారు. తద్వారా హిందువులను, మతవాదులను తనవైపుకు తిప్పుకొని ఓట్లు కొల్లగొడుతారు.. దీన్నే 'డాగ్ విజిల్ పాలిటిక్స్' అంటారు" అని ప్రధాని నరేంద్రమోడీ పాలిట్రిక్స్ ను ఓవైసీ ఎండగట్టారు.

అదే జోష్ లో స్టేజీ దిగుతూ స్టెప్పులు వేస్తూ పార్టీ గుర్తు గాలిపటం ఎగరవేస్తున్నట్టుగా డ్యాన్స్ చేసి కార్యకర్తల్లో జోష్ నింపారు. ఓవైసీ చేసిన డ్యాన్స్ వీడియో ఇప్పుడు వైరల్ గా మారింది.