ఆస్పత్రి నిర్వాకం...బతికున్న కరోనా పేషెంట్ ను చంపేశారు

ఈ నెల 4వ తేదీన శిబ్దాస్‌ బెనర్జీ(75) అనే వృద్ధుడు బెంగాల్ లోని బలరాంపూర్‌ బసు ఆస్పత్రిలో కరోనాకు చికిత్స పొందుతున్నారు. అదే రోజున మోహినిమోహన్‌ ముఖర్జీ(75) అనే వ్యక్తి కూడా కరోనా బారిన పడి అదే ఆసుపత్రిలో చేరారు. నవంబర్‌ 13న బెనర్జీ చనిపోయారంటూ ఆయన కుటుంబ సభ్యులకు ఆసుపత్రి సిబ్బంది సమాచారమిచ్చారు. కరోనాతో మృతి చెందడంతో మృతదేహాన్ని ప్రొటెక్టివ్‌ మెటిరియల్‌తో కప్పి కుటుంబ సభ్యులకు అందజేశారు. ఆ తర్వాత కుటుంబ సభ్యులు తమ సంప్రదాయం ప్రకారం అంత్యక్రియలు కూడా నిర్వహించారు. అయితే, వారం రోజుల తర్వాత బెనర్జీ బ్రతికే ఉన్నారంటూ బెనర్జీ కుటుంబ సభ్యులకు ఆసుపత్రి సిబ్బంది ఫోన్ చేశారు. పొరపాటున ముఖర్జీ మృతదేహాన్ని అప్పగించామని బెనర్జీ కుటుంబ సభ్యులకు తెలిపారు. ఆ కుటుంబ సభ్యులకు. ... బెనర్జీ బతికే ఉన్నారన్న ఆనందం....ఆసుపత్రి చేసిన నిర్వాకానికి కోపం....రెండూ ఒకేసారి వచ్చాయి. దీంతో, ఈ వ్యవహారంపై ఉన్నతాధికారులకు వారు ఫిర్యాదు చేశారు. అయితే, ముఖర్జీని చికిత్స కోసం బర్సాత్‌కు తరలించామని, ఆ సమయంలో ముఖర్జీకి బదులు బెనర్జీ మెడికల్‌ రిపోర్టును ఇవ్వడంతో ఈ పొరపాటు జరిగిందని ఆసుపత్రి డీన్ వివరణ ఇచ్చారు. బర్సాత్ లో చికిత్స పొందుతున్న ముఖర్జీ చనిపోయారని, మారిన రిపోర్ట్ లో బెనర్జీ అడ్రస్ ఉండడంతో బెనర్జీ కుటుంబ సభ్యులకు ముఖర్జీ శవాన్ని అప్పగించామని తెలిపారు.