నిమ్మల కిష్టప్ప సీటుకు ఎసరొస్తోందా?

అనంతపురం టీడీపీలో సీనియర్ నేతకు పొగపెట్టే కార్యక్రమం మొదలైనట్లుగా తెలుస్తోంది. హిందూపురం నుంచి ఎంపీగా ఉన్న బీసీ నేత నిమ్మల కిష్టప్ప సీటుకు ఎసరొస్తున్నట్లుగా వినిపిస్తోంది. సొంత పార్టీ నేతే తన తనయుడి కోసం చంద్రబాబు వద్ద హిందూపురం పార్లమెంటు సీటు కోరుతుండడంతో అక్కడి రాజకీయం రసకందాయంలోపడింది.

ఏపీ మంత్రి పరిటాల సునీత వచ్చే ఎన్నికల్లో తన తనయుడిని ఎన్నికల బరిలో దించాలని భావిస్తున్నారు. అయితే.. అసెంబ్లీకి కాకుండా పార్లమెంటుకు పోటీ చేయించాలనేది ఆమె అభిమతంగా తెలుస్తోంది. మొన్న మహానాడులో చంద్రబాబు వద్ద కూడా ఈ ప్రస్తావన వచ్చినట్టుగా తెలుస్తోంది.

హిందూపురం ఎంపీ సీటు నుంచి తనయుడిని పోటీ చేయించాలని ఆమె భావిస్తోందని సమాచారం. హిందూపురం నుంచి ఎంపీగా శ్రీరామ్ ను పోటీ చేయించాలని ఆమె చంద్రబాబు వద్ద కొన్నాళ్లుగా ప్రతిపాదిస్తున్నట్టుగా తెలుస్తోంది. ఇప్పుడు ఈ విషయంలోనే ఆమె గట్టిగా పట్టు బట్టిందట. అయితే హిందూపురం నుంచి ఎంపీగా ఉన్న నిమ్మల కిష్టప్పను ఏం చేస్తారన్నదే ప్రశ్న. నిమ్మల కిష్టప్ప పదేళ్ల నుంచి హిందూపురం ఎంపీగా ఉన్నారు. ఒక బీసీ వర్గానికి చెందిన వ్యక్తిని కాదని చంద్రబాబు ఇక్కడ కమ్మ కులానికి చెందిన వ్యక్తికి అవకాశం ఇస్తారా అన్నది చూడాలి.