పవన్ కు ఊహించని బహుమతి ఇచ్చిన అభిమాని

ఏపీ రాజధాని అమరావతిలో పర్యటించిన జనసేన అధినేత పవన్ కల్యాణ్ కు ఊహించిన బహుమతిని అందజేశారు ఆయన వీరాభిమాని. ఊహించలేని రీతిలో ఉన్న ఆ బహుమతి ఇప్పుడు హాట్ టాపిక్ గా మారింది. రాజధాని ప్రాంతంలోని ప్రజల సమస్యల్ని తెలుసుకునేందుకు పర్యటించిన పవన్ కు.. ఆయన అభిమాని ఒకరు చెప్పుల్ని బహుమతిగా ఇచ్చారు.

నిడమర్రు గ్రామానికి పర్యటనగా వచ్చిన పవన్ వద్దకు వెళ్లిన అభిమాని ఒకరు.. తమ ప్రాంతానికి తొలిసారి వచ్చిన నేపథ్యంలో తాను ఇస్తున్న బహుమతిని తీసుకోవాల్సిందిగా కోరారు. తానిచ్చిన చెప్పులతో తమ ప్రాంతంలో నడవాలని ఆయన కోరారు. సాధారణంగా ప్రముఖులు వచ్చినప్పుడు వారికిచ్చే బహుమతులకు భిన్నంగా చెప్పుల్ని ఇచ్చి.. వేసుకోవాలని కోరారు.

అభిమాని కోరికను అంగీకరించిన పవన్.. ఆయన కోరినట్లే.. బహుమతిగా ఇచ్చిన చెప్పుల్ని వేసుకొని పర్యటించటం విశేషం. మొత్తానికి అభిమాని ఆదేశించారు.. పవన్ పాటించారన్నట్లుగా ఉన్న ఈ ఉదంతం అక్కడి వారి మనసుల్ని టచ్ చేసింది. అభిమానుల కోసం దేనికైనా సరే... అన్నట్లుగా ఉంటానన్న విషయాన్ని పవన్ మరోసారి నిరూపించారన్న మాట ఆయన అభిమానుల నోట వినిపించటం గమనార్హం.