బంతి.. అవంతి: వెల్లుల్లి.. వెల్లంపల్లి.. పవన్ చురకలు మామూలుగా లేవుగా?

తనను అదే పనిగా ఆడిపోసుకునే వైసీపీ నేతలకు ఘాటు కౌంటర్ ఇచ్చారు జనసేనాని పవన్ కల్యాణ్. జనసేన తొమ్మిదో ఆవిర్భాభ సభలో మాట్లాడిన పవన్ కల్యాణ్.. తనపై విమర్శలు చేసే వైసీపీ మంత్రులపై ఘాటు చురకలు తగిలించారు. బహిరంగ సభలో మాట్లాడటానికి వచ్చే ముందే.. వైసీపీ మంత్రులు తనపై విమర్శలు చేశారని.. తిట్టేశారన్న విషయం తనకు తెలిసిందంటూ పలువురు మంత్రులపై ఆయన మండిపడ్డారు.

ఈ సందర్భంగా ఆయన చేసిన వ్యాఖ్యలు సదరు మంత్రులకు కొత్త పేర్లు ఖాయమయ్యేలా ఉన్నాయని చెప్పక తప్పదు. మంత్రి అవంతి శ్రీనివాస్ ను ఉద్దేశించి.. గోడకు కొడితే తిరిగి రాని బంతి.. చేమంతి.. అవంతి నన్నేదో అన్నారట.. నేనింకా మాట్లాడలేదు.. అప్పుడే అంత తొందరెందుకు? అంటూ వ్యాఖ్యానించిన ఆయన.. మంత్రి వెల్లంపల్లిని సైతం విడిచిపెట్టలేదు. మంత్రి వెల్లంపల్లి.. వెల్లుల్లి అంటూ చురకలేశారు.

తనను అదే పనిగా బూతులు తిట్టే వైసీపీ నేతలపైనా మండిపడ్డారు. ఈ సందర్భంగా కాకినాడ ఎమ్మెల్యే ద్వారంపూడి చంద్రశేఖర్ రెడ్డి అనే వ్యక్తి తనను అకారణంగా పచ్చి బూతులు తి్టటారని.. అది వైసీపీకి అలవాటేనని తాను భరించానని.. తనను తిడితే జనసైనికులు.. వీర మహిళలకు కోపం వస్తుందన్నారు.

గతంలో ద్వారంపూడి కుటుంబానికి ఎస్పీ డీటీ నాయక్ ట్రీట్ మెంట్ జరిగిందని.. భవిష్యత్తులో ఇలానే చేస్తే.. భీమ్లా నాయక్ ట్రీట్ మెంట్ అంటే ఏమిటో చూపిస్తామన్నారు. ఇలా తనను టార్గెట్ చేసే వైసీపీ నేతల్ని పవన్ వదిలిపెట్టలేదు.