జ‌న‌సేనాని లండ‌న్ ట్రిప్ షురూ!

త్రివిక్ర‌మ్ శ్రీ‌నివాస్ తో ప‌వ‌ర్ స్టార్ ప‌వ‌న్ క‌ల్యాణ్ చేస్తున్న సినిమా షూట్ సా..గుతోంది. ఇప్ప‌టికే ఈ సినిమాకు సంబంధించిన రిలీజ్ డేట్ ను అన‌ధికారికంగా ప‌లు మార్పులు చేర్పులు చేశారు. సినిమా బాగా వ‌చ్చేందుకు మ‌ధ్య మ‌ధ్య‌లో చేసిన క‌స‌ర‌త్తు సినిమా రిలీజ్ మీద ప్ర‌భావం ప‌డిన‌ట్లుగా చెబుతారు.

ఈ సినిమాకు.. త‌న పొలిటిక్స్ కు లింకు పెట్టుకున్న ప‌వ‌న్ క‌ల్యాన్‌.. ముందుకు వెళ్ల లేక‌.. వెన‌క్కి పోలేని విచిత్ర‌మైన ప‌రిస్థితుల్లో ఉన్నారు. ఈ సినిమాను కంప్లీట్ చేయ‌టం ఆల‌స్యం.. రాజ‌కీయాల మీద ఫోక‌స్ పెంచాల‌ని భావిస్తున్నారు. అయితే ఆగ‌స్టు లేదంటే సెప్టెంబ‌రుతో ఈ సినిమా షూట్ ఒక కొలిక్కి వ‌చ్చేస్తుంద‌ని భావించినా.. నెల‌కు నెల యాడ్ అవుతున్న ప‌రిస్థితి.

దీంతో.. ప‌వ‌న్ పొలిటిక‌ల్ క్యాలెండ‌ర్లో మార్పులు చోటు చేసుకుంటున్నాయి. ఇటీవ‌ల ఫారిన్ షూట్ కోసం వెళ్లిన ప‌వ‌న్ త‌న పార్ట్ ముగించేసుకొని లండ‌న్ ఈ రోజు ఉద‌యం (శుక్ర‌వారం) చేరుకున్నారు. ఇక్క‌డ ఇండియా- యూరోపియ‌న్ బిజినెస్ ఫోరం ప్ర‌దానం చేసే ఎక్స్ లెన్సీ అవార్డును ఆయ‌న తీసుకోనున్నారు.

విడుద‌ల‌య్యే సినిమాతో క‌లిపి లెక్కేసుకుంటే పాతిక సినిమాల వ‌ర‌కు తీసిన ప‌వ‌న్‌కు సినిమాల ప‌రంగా వ‌చ్చిన అవార్డులు త‌క్కువ‌నే చెప్పాలి. అలాంటిది అర‌కొర‌గా పెట్టిన రాజ‌కీయ పార్టీతో.. క‌మ్ సినిమాల‌కు గుర్తింపుగా ఆయ‌న‌కు ఫారిన్ ఫోరం ఒక‌టి అవార్డు ఇవ్వ‌టం ఇప్పుడు ఆస‌క్తిక‌రంగా మారింది. అవార్డును అందుకోవ‌టానికి లండ‌న్ వెళ్లిన ప‌వ‌న్ అక్క‌డే మ‌రో రెండు రోజులు ఉండ‌నున్నారు. ఈ సంద‌ర్భంగా ఆయ‌న ప‌లు కార్య‌క్ర‌మాల్లో పాల్గొంటార‌ని చెబుతున్నారు.