పీకే... లండ‌న్ టూర్‌ తోనే సీఎం అయ్యారే!

అదేంటీ.. గ‌డ‌చిన ఎన్నిక‌ల్లో ప్ర‌త్య‌క్ష పోటీకి వెనుకాడి... టీడీపీ - బీజేపీ కూట‌మికి మ‌ద్ద‌తిచ్చిన జ‌న‌సేన అధినేత‌ - టాలీవుడ్ ప‌వ‌ర్ స్టార్ ప‌వ‌న్ క‌ల్యాణ్‌ ఎప్పుడు ముఖ్యమంత్రి అయిపోయారు? గ‌డ‌చిన ఎన్నిక‌ల‌ను ప‌క్క‌న‌బెడితే... మ‌ళ్లీ ఎన్నిక‌ల‌కు ఇంకా ఏడాదిన్న‌ర స‌మ‌యం ఉంది. ఆ ఎన్నిక‌ల క్ర‌తువు ముగిసి ఎవ‌రు గెలుస్తారో, ఎవ‌రు ఓడ‌తారో చూస్తే గానీ ప‌వ‌న్ క‌ల్యాణ్ సీఎం అవుతారా? లేదా? అన్న‌ది తేలుతుంది. మ‌రి ఇంత తతంగం ఉన్నా... ప‌వ‌న్ క‌ల్యాణ్ ఎప్పుడు సీఎం అయిపోయార‌నుకుంటున్నారా? వాస్త‌వంగా అయితే కాలేదు గానీ... ఆయ‌న అభిమానులు మాత్రం ఆయ‌న‌ను నిజంగానే సీఎంను చేసేశారు.

ఇక అస‌లు విష‌యంలోకి వ‌స్తే... లండ‌న్ ప‌ర్య‌ట‌న ముగించుకుని నిన్న హైద‌రాబాదు చేరుకున్న ప‌వ‌న్ క‌ల్యాణ్‌ కు శంషాబాద్ ఎయిర్ పోర్టు వ‌ద్ద ఘ‌న స్వాగ‌తం ల‌భించింది. లండ‌న్ ప‌ర్య‌ట‌న‌లో ఐఈబీఎఫ్ అవార్డును అందుకోవ‌డంతో పాటుగా అక్క‌డి ప‌లు విశ్వ‌విద్యాల‌యాల విద్యార్థుల‌తో ప్ర‌త్యేక స‌మావేశాలు నిర్వ‌హించేందుకు వెళ్లిన ప‌వ‌న్‌... ఆ ప‌ర్య‌ట‌న‌ను విజ‌య‌వంతంగా ముగించుకుని వ‌చ్చారు. ఇక ప‌వ‌న్ హైద‌రాబాదు వ‌చ్చేస్తున్నార‌న్న విష‌యం తెలుసుకున్న ఆయ‌న అభిమానులు - జ‌న‌సేన పార్టీ కార్యక‌ర్త‌లు పెద్ద సంఖ్య‌లో ఎయిర్ పోర్టుకు వ‌చ్చి ఆయ‌న‌కు గ్రాండ్‌ గా వెల్‌ క‌మ్ చెప్పారు. ఈ సంద‌ర్భంగా ప‌వ‌న్‌ ను ఆయ‌న అభిమానులు *సీఎం - సీఎం* అంటూ కీర్తించారు. ప‌వ‌న్ సీఎం అన్న నినాదాలు అక్క‌డ పెద్ద పెట్టున వినిపించాయి.

భారీ జ‌న‌సందోహం మ‌ధ్య ఉబ్బిత‌బ్బిబ్బైన ప‌వ‌న్ ఎలాగోలా అక్క‌డి నుంచి బ‌య‌ట ప‌డ‌గా... అభిమానులు మాత్రం త‌మ హీరోను చూసుకుని మురిసిపోయార‌ట‌. ఇదే విష‌యాన్ని మీడియా కూడా భారీగానే హైలెట్ చేసేసింద‌నే చెప్పాలి. ప‌వ‌న్‌కు స్వాగ‌తం చెబుతున్న సంద‌ర్భంగా అభిమానులు తీసుకున్న సెల్ఫీ వీడియోలు.. ఎయిర్ పోర్టు నుంచి ప‌వ‌న్ ఇంటికి చేర‌క‌ముందే సోష‌ల్ మీడియాలోకి చేరిపోయాయి. దీంతో నిన్న రాత్రంతా పీకే సీఎం అంటూ అభిమానులు చేసిన సంద‌డితో ఉన్న వీడియోలు సోష‌ల్ మీడియాలో వైర‌ల్‌ గా మారాయి. వ‌చ్చే ఏడాది జ‌ర‌గ‌నున్న ఎన్నిక‌ల త‌ర్వాత ప‌వ‌న్ సీఎం అవుతారో - లేదో తెలియ‌దు గానీ... ఇప్పుడే ఆయ‌న‌ను సీఎంగా చేసుకుని ఆయ‌న అభిమానులు మాత్రం సంబ‌ర‌ప‌డిపోతున్నారు.