నయీం డబ్బు నేలపాలేనా?

ఎన్ కౌంటర్ లో హతమైన గ్యాంగ్ స్టర్ నయీం గురించి కొత్తగా చెప్పేదేమీలేదు. నయీం దోచుకున్న డబ్బు ఏమైందో ఇప్పటివరకు లెక్క తేలలేదు. వేల కోట్ల రూపాయలు ఆయన వద్ద పోగుపడి ఉందని మాత్రం అనుమానిస్తున్నారు. ఆ డబ్బును ఆయన ముఖ్య అనుచరులు కొందరు కాపాడుతున్నారని... ఇప్పుడు వారి ఆధీనంలోనే ఉందని పోలీసులూ అనుమానిస్తున్నారు. మాజీ మావోయిస్టయిన నయీం కొంత డబ్బును నల్లమలలో డంపులు ఏర్పాటుచేసుకుని దాచినట్లూ చెబుతారు. తాజాగా బడా కరెన్సీ క్యాన్సిల్ అయిన నేపథ్యంలో ఆ డబ్బు పరిస్థితి ఏమిటన్న ప్రశ్న ఉదయిస్తోంది.

నయీం బతికి ఉన్న కాలంలో పెద్ద ఎత్తున దందాలు సాగించాడు. బెదిరించి కోట్లకు వసూళ్లు చేశాడు. ఆ డబ్బంతా కొంత ఖాతాల్లో మరికొంత రహస్య ప్రాంతాల్లో దాచిపెట్టాడు. నయీం భూములు - ఆస్తుల వివరాలను పోలీసులు సంపాదించినా నగదు నిల్వలు ఎక్కడున్నాయన్నది మాత్రం పూర్తిగా తెలుసుకోలేకపోయారు. ఇప్పుడు 500 - 1000 నోట్ల రద్దుతో వాటినీ మార్చుకోవాల్సిన పరిస్థితి ఏర్పడింది. దీంతో నయీం ముఖ్య అనుచరులు ఆ నోట్ల మార్పిడికి ప్రయత్నించే అవకాశం ఉంది.

దీంతో పోలీసులు నయీం బ్యాచ్ పై నిఘా పెట్టినట్లుగా తెలుస్తోంది. కలుగులోని ఎలకలు ఇప్పుడు బయటకొస్తే నయీం డంపుల గుట్టు దొరుకుతుందని పోలీసులు ఆశపడుతున్నారు. పోలీసుల ప్లాను ఫలిస్తుందో లేదంటే నయీం అనుచరులు చల్లగా ఆ క్యాష్ ను మార్చేస్తారో చూడాలి.లేదంటే వాటిని మార్చలేక వదులుకుంటారో చూడాలి.

Like Us on Facebook : https://www.facebook.com/Tupakidotcom/