డ్రగ్స్ రాకెట్ లో మమతా కులకర్ణిపై రెడ్ కార్నర్

నాటి తరం హీరోయిన మమతా కులకర్ణికి సంబంధించి షాకింగ్ నిజాలు బయటకు వచ్చాయి. ఇప్పటివరకూ అవునేమో? అనుకుంటున్నారు? భావిస్తున్నారు? తెలుస్తోంది? అలా అంటున్నారు? లాంటి మాటల్ని ఇక వాడాల్సిన అవసరం లేదని తేలిపోయింది. ఎందుకంటే.. ఆమె డ్రగ్స్ రాకెట్ లో ప్రత్యక్ష సంబంధం ఉందన్న విషయాన్ని ముంబయి శివారు పట్టణంలోని థానే పోలీసులు తేల్చేశారు. నేర చరిత్రలోనే అత్యంత భారీ రాకెట్ గా చెబుతున్న రూ.2వేల కోట్ల విలువైన డ్రగ్స్ ను పట్టివేసిన కేసులో మమతా కులకర్ణికి సంబంధం ఉందన్న మాట వినిపించింది.

ఈ డ్రగ్ రాకెట్ మూలాలు ఆఫ్రికా దేశమైన కెన్యాలో ఉన్నట్లు గుర్తించటంతో పాటు.. ఈ రాకెట్ లో మమతా భర్త.. ఇంటర్నేషనల్ స్మగ్లర్ విక్కీ గోస్వామిని పోలీసులు అరెస్ట్ చేశారు. అయితే.. మమతా కులకర్ణి తన భార్య కాదని విక్కీ గోస్వామి చెప్పటం.. డ్రగ్స్ మాఫియాతో తనకు ఎలాంటి సంబంధం లేదని తాను ఉత్త అమాయకురాలినని మమతా నమ్మబలికారు. అయితే.. వారి మాటలు అబద్ధాలని.. వారిద్దరూ భార్యభర్తలని పోలీసులు చెబుతున్నారు. అంతేకాదు.. ప్రస్తుతం ఆమెపై రెడ్ కార్నర్ నోటీసుల్ని జారీ చేశారు.

డ్రగ్స్ మాఫియాకు మమతా కులకర్ణికి.. ఆమె భర్త విక్కీ గోస్వామికి సంబంధాలు ఉన్నాయని.. తమ దర్యాప్తులో ఇందుకు సంబంధించిన ఆధారాలు లభించినట్లుగా పోలీసులు వెల్లడించారు. భారీ డ్రగ్స్ పట్టివేత కేసులో ఆమె పేరును కూడా చేర్చినట్లుగా వెల్లడించారు. ఇక.. ఆమెను అదుపులోకి తీసుకున్న పోలీసుల.. ఆమెను విచారించగా.. బాలీవుడ్ కు సంబంధించిన అనేక మంది సెలబ్రిటీలు ఈడ్రగ్ మాఫియాతో సంబంధాలు ఉన్నట్లుగా తేలిందన్న థానే పోలీస్ ఆఫీసర్ పరంవీర్ సింగ్ వెల్లడించారు. అయితే.. ఈ సెలబ్రిటీలు ఎవరన్న విషయాన్ని మాత్రం బయటపెట్టేందుకు ఆయన ఇష్టపడలేదు. డ్రగ్స్ రాకెట్ విషయానికి సంబంధించి మమతా నోరు విప్పించటంలో పోలీసులు సక్సెస్ అయిన నేపథ్యంలో.. త్వరలో బాలీవుడ్ కు చెందిన పలు షాకింగ్ న్యూస్ బయటకు వచ్చే అవకాశం ఉన్నట్లుగా తెలుస్తోంది.