అసెంబ్లీ సమావేశాల వరకు ఆగకుండా.. ప్రగతిభవన్ వద్ద ట్రిఫుల్ ఆర్

రాజకీయాల్లో ఉన్న వారు బోలెడన్ని మాటలు చెప్పొచ్చు. పొలిటికల్ మైలేజీ కోసం చెప్పే మాటల్ని గుర్తు పెట్టుకొని మరీ ఆ తర్వాత చేయటం చాలా తక్కువ మందే చేస్తారు. అలాంటి విషయాల్లో ఎంత గుర్తు ఉంటుందన్నది పక్కన పెడితే.. కేసీఆర్ విషయం లో తెలంగాణ బీజేపీ అధ్యక్షుడు బండి సంజయ్ మాత్రం తనకు గుర్తు ఎక్కువన్న విషయాన్ని తాజాగా చేతల్లో చేసి చూపించిన వైనం అందరిని ఆకర్షిస్తోంది. తాజాగా వెల్లడైన హుజూరాబాద్ ఉప ఎన్నిక ఫలితం నేపథ్యం లో.. ఈ ఎన్నికల ప్రచార వేళ లో తాను చెప్పిన పనినే.. బండి సంజయ్ బ్యాచ్ చేతల్లో చేసి చూపించిన వైనం పై హాట్ చర్చ సాగుతోంది.

హుజూరాబాద్ ఉప ఎన్నికల ప్రచారం సందర్భం గా బండి సంజయ్ మాట్లాడుతూ.. ‘‘కేసీఆర్.... అసెంబ్లీ లో నీకు డబుల్ ఆర్ (రాజాసింగ్, రఘునందన్) చుక్కలు చూపిస్తున్నరు. హుజూరాబాద్ ఎన్నికల తరువాత మరో ఆర్ (రాజేందర్) వస్తున్నడు. ప్రగతి భవన్ ముందు నీకు ‘‘ట్రిపుల్ ఆర్’’ సినిమా చూపిస్తా’’ అంటూ వ్యాఖ్యానించారు. ఆ మాటను రియాలిటీ లోకి తెచ్చే ప్రయత్నం చేశారు బండి సంజయ్ బ్యాచ్.

హుజూరాబాద్ లో మంచి మెజార్టీ తో అద్భుత విజయాన్ని సాధించిన ఈటల రాజేందర్ విజయోత్సవాన్ని.. తమ నాయకుడు బండి సంజయ్ చెప్పినట్లే.. ఒక ఆటో ట్రాలీకి బండి సంజయ్ నిలువెత్తు ఫోటో.. దాని పక్కనే ట్రిఫుల్ ఆర్.. (రాజాసింగ్.. రఘునందన్.. రాజేందర్ ఈటల)తో కూడిన ఫోటో.. ట్రిపుల్ ఆర్ ఇమేజ్ తో కూడిన ఒక ఫ్లెక్సీ ని కట్టి.. సరిగ్గా ప్రగతిభవన్ బయట ఉన్న బ్యారికేడ్ వద్ద కాసేపు నిలిపి ఉంచారు. దీని ద్వారా.. బహి రంగసభ లో తాను చెప్పినట్లు గా ట్రిపుల్ ఆర్ సినిమా ను తనకు తగ్గట్లు చూపించే ప్రయత్నం చేశారు.

ఈ సందర్భం గా బీజేపీ నేతలు.. కార్య కర్తలు ప్రగతిభవన్ ఎదుట ఉన్న రోడ్డు మీద డ్యాన్సులు వేసిన వైనం తో పోలీసులు అలెర్టు అయ్యారు. మీడియా కూడా చేరుకోవటం తో.. అక్కడే ఉన్న పోలీసులు.. ఈ వాహనాన్ని బీజేపీ కార్యకర్తల్ని పంపించేశారు. మొత్తం గా ఈటల విజయం సాధించిన వేళ.. బండి తన దైన మార్కుతో ప్రగతిభవన్ వద్ద హడావుడి చేయటం ఆసక్తికరంగా మారింది.