జగన్ - చిరు భేటీపై వర్మ కామెంట్ విన్నారా?

ఇప్పుడు తెలుగు నేల వ్యాప్తంగా ఏపీ సీఎం వైఎస్ జగన్ మోహన్ రెడ్డి, టాలీవుడ్  మెగాస్టార్ చిరంజీవిల భేటీ గురించే చర్చ నడుస్తోంది. వారం రోజులుగా అప్పుడు కాదు ఇప్పుడు అంటూ ఈ భేటీ వాయిదాలు పడుతూ వస్తుండగా ఈ భేటీ ఎప్పుడెప్పుడు జరుగుతుందా? అంటూ అంతా ఆసక్తిగా ఎదురు చూశారు. ఈ ఎదురుచూపులకు ఫుల్ స్టాప్ పెడుతూ సోమవారం మధ్యాహ్నం చిరంజీవి సతీసమేతంగా తాడేపల్లిలోని జగన్ ఇంటికి వెళ్లారు. చిరు దంపతులను సాదరంగా ఆహ్వానించిన జగన్... చిరుతో కలిసి లంచ్ కూడా చేశారు. ఆ తర్వాత ఇంటి బయటకు వచ్చి మరీ చిరును జగన్ సాగనంపిన వైనాన్ని కూడా అందరూ ఆసక్తిగా తిలకించారు.

ఆసక్తిగా ఎదురుచూసిన భేటీ ముగియడంతో... ఈ భేటీలో జగన్ - చిరు ఏం మాట్లాడుకున్నారన్న కోణంలోనూ ఆసక్తికర విశ్లేషణలు మొదలయ్యాయి. ఇలాంటి క్రమంలో ఎంట్రీ ఇచ్చిన సంచలన దర్శకుడు రాంగోపాల్ వర్మ... జగన్ - చిరు భేటీపై ఆసక్తికర ట్వీట్ పోస్ట్ చేశారు. ఏ ఒక్కరికీ తట్టని విషయాన్ని పట్టేసిన వర్మ... ఈ భేటీపై అదిరేటి కామెంట్ చేశారు. చిరుకు జ్ఝాపికను అందజేస్తున్న జగన్ ఫొటోను పోస్ట్ చేసిన వర్మ... దానికి ‘వావ్... 151 విత్ 151’ అంటూ జోడించిన కామెంట్ ఇప్పుడు సోషల్ మీడియాలో వైరల్ గా మారిపోయింది. అయినా వర్మ చేసిన ఈ కామెంట్ లో 151 విత్ 151 అంటే ఏమిటనేగా మీ డౌటు?

అయితే అసలు విషయంలోకి వెళదాం పదండి. మెగాస్టార్ చిరంజీవి తాజా చిత్రం సైరా నరసింహారెడ్డి ఆయన నటించిన చిత్రాల్లో 151వ చిత్రమన్న విషయం తెలిసిందే కదా. ఇక మొన్నటి ఎన్నికల్లో అధికార టీడీపీని చిత్తుచిత్తుగా ఓడించిన వైసీపీ ఏకంగా 151 స్థానాలను కైవసం చేసుకున్న విషయమూ తెలిసిందే కదా. ఈ 151 సీట్ల విజయం ఘనత జగన్ దేనని అంతా తేల్చేశారు. ఇదే విషయాన్ని పట్టేసిన వర్మ... 151 సినిమాల హీరో అయిన చిరంజీవి... 151 సీట్లు గెలిచిన జగన్ తో భేటీ అయ్యారని చెప్పేందుకే ‘151 విత్ 151’ అని కామెంట్ చేశారన్న మాట. నిజమే మరి.. మనలాంటి బుర్రలకు ఈ విషయం తట్టదు కదా. అదే వర్మది స్పాంటేనియస్ బుర్ర కదా... అందుకే ఈ విషయం ఆయనకే తట్టింది.