టెలికాం రంగంలో జియో మరో సంచలనం..

టెలికాం వినియోగదారులంతా ఎంతో ఆసక్తిగా ఎదురుచూసిన జియో బ్రాడ్ బ్యాండ్ సేవలను ముఖేష్ అంబానీ ప్రకటించారు. జియో గిగా ఫైబర్ పేరుతో జియో బ్రాడ్ బ్యాండ్ రంగంలోకి దిగుతోంది. ఈ సేవల తేదిని తాజాగా ముఖేష్ అంబానీ కొడుకు - కూతురు అకాశ్ - ఇషా అంబానీలు ప్రకటించారు.

ముంబైలో జరుగుతున్న రిలయన్స్ 41వ వార్షిక సర్వసబ్య సమావేశంలో ఈ సేవలకు సంబంధించిన ప్రకటనను చేశారు. ఆగస్టు 15 నుంచి దేశవ్యాప్తంగా జియో గిగా ఫైబర్ సేవలు అందుబాటులోకి రానున్నాయి. జియో గిగా ఫైబర్ కోసం మై జియో - జియో.కామ్ వెబ్ సైట్లలో ప్రజలు రిజిస్టేషన్ చేసుకోవచ్చని తెలిపారు.

దాదాపు 1100 నగరాల్లో అత్యాధునిక - ఫైబర్ ఆధారిత బ్రాడ్ బ్యాండ్ సేవలను అందించనున్నట్టు ముఖేష్ అంబానీ వెల్లడించారు. గత కొన్ని నెలలుగా ఎంపిక చేసిన నగరాల్లో జియో ఫైబర్ బీటా సేవల టెస్టింగ్ జరుగుతోంది. ఇకపై జియో ఫైబర్ సేవలు ఇళ్లకు - వ్యాపారస్థులకు - చిన్న మధ్య తరహా సంస్థలకు అందుబాటులోకి రానుంది. జియో గిగా ఫైబర్ అందుబాటులో ఉండే రెండు ముఖ్య ఫీచర్లు స్మార్ట్ హోం టెక్నాలజీ - టీవీ కాలింగ్ - సెట్ అప్ బాక్స్ ద్వారా టీవీలో సైతం జియో గిగా ఫైబర్ సేవలు వాడుకోవచ్చు. జియో ఫోన్లో సైతం ఈ అడ్వాన్స్ డ్ ఫీచర్లు ఉంటాయని కంపెనీ తెలిపింది.

కంపెనీ వార్షికోత్సవంలో జియో గిగా ఫైబర్ పనివిధానాన్ని అకాష్ అంబానీ - ఇషా అంబానీ - ఆర్ ఐఎల్ ప్రతినిధి కిరణ్ వివరించారు. ఈ సరికొత్త ఫీచర్లను ఎలా వినియోగించవచ్చనే దాన్ని ప్రత్యక్ష ప్రదర్శన ద్వారా చూపించారు.