తాజ్‌ మ‌హ‌ల్ కాదు...రామ్ మ‌హ‌ల్‌

ఉత్తర్‌ ప్రదేశ్ భైరియా బీజేపీ ఎమ్మెల్యే సురేంద్ర సింగ్ మరోసారి వివాదాస్పద వ్యాఖ్యలు చేశారు. 2024 నాటికి భారత్ హిందూ దేశంగా అవతరిస్తుందని ఆయన గతనెలలో వ్యాఖ్యానించారు. తాజాగా భారత్ మాతాకీ జై అనని వారు పాకిస్థానీలని ఓ కార్యక్రమంలో అన్నారు. దీంతోపాటు వందేమాతరం పలుకని వారిని కూడా రాజకీయాల్లోకి వచ్చేందుకు అనుమతించొద్దని సూచించారు. తన తల్లిని - మాతృభూమిని గౌరవించనివారి దేశభక్తిని అనుమానించాల్సి ఉంటుందని పేర్కొన్నారు. ప్రభుత్వ అధికారులు వ్యభిచారులని - లంచం అడిగితే వారి ముఖంపై చెప్పుతో కొట్టాలని గతంలో సురేంద్రసింగ్ చేసిన వ్యాఖ్యలు వివాదాస్పదమయ్యాయి. ఇలా నిత్యం వివాదాస్పద వ్యాఖ్యలతో వార్తల్లో ఉండే యూపీ బీజేపీ ఎమ్మెల్యే సురేంద్రసింగ్ తాజాగా ప్రముఖ కట్టడం తాజ్‌మహల్‌పై నోరుజారారు.

మొఘలుల కాలంలో నిర్మించిన రహదారులు - స్మారక కట్టడాలు - నిర్మాణాల పేర్లను మార్చాలని సురేంద్ర సింగ్ డిమాండ్ చేశారు. అలాగే తాజ్‌ మహల్ పేరును రామ్ మహల్ లేదంటే కృష్ణ మహల్ - శివాజీ మహల్‌ గా మార్చాలని ఓ ప్రశ్నకు ఆయన సమాధానమిచ్చారు. ``మొఘలుల నిర్మాణాలను ప్రస్తుతం ధ్వంసం చేయలేం. ఎందుకంటే అవి ఇక్కడి మట్టి, వనరులతో నిర్మించారు. కాబట్టి ఆ నిర్మాణాలకు ఇక్కడి వారి పేర్లు పెట్టడమే సముచితం. నాకు అవకాశం ఇస్తే తాజ్‌మహల్‌కు రాష్ట్ర భక్త మహల్ అని నామకరణం చేస్తా. మొఘలుల ఏదైనా కట్టడానికి డాక్టర్ అబ్దుల్ కలాం పేరు పెట్టండి. ఆ అనుభూతి చాలా అద్భుతంగా ఉంటుంది. అలాగే కోల్‌ కతాలోని విక్టోరియా మహల్ పేరును జానకి ప్యాలస్ అని మారిస్తే బాగుంటుంది` అని వ్యాఖ్యానించారు.