కేటీఆర్ ను ఇరకాటంలో పెట్టిన రేవంత్ రెడ్డి

గ్రేటర్ ఓట్ల కోసం ఆంధ్రవాళ్లను దువ్వుతున్న కేటీఆర్ కు టీటీడీపీ నేత రేవంత్ రెడ్డి తనదైన స్టైల్లో కౌంటరేశారు. టీఆరెస్ పేరు తెలుగు రాష్ట్రాల సమితిగా మారుస్తామని.. తాను భీమవరం నుంచి పోటీ చేస్తానని చెబుతున్న కేటీఆర్ కు రేవంత్ అంతేస్థాయిలో పంచ్ వేశారు. తొలుత తెలంగాణ భవన్ పేరును తెలుగు భవన్ గా మార్చి అప్పుడు ఈ మాటలన్నీ చెప్పాలని సూచించారు. గ్రేటర్ హైదరాబాద్ ఎన్నికల కోసం ఆంద్ర ప్రజల పట్ల ఎంతో ప్రేమ ఉన్నట్లు కెటిఆర్ మాట్లాడుతున్నారని ఆయన విమర్శించారు. సాధారణ ఎన్నికల సమయంలో కోస్తా - రాయలసీమ ప్రజల మనోభావాలను దెబ్బతీసి,తెలంగాణలో ప్రజల సెంటిమెంట్ ను రెచ్చగొట్టి... ఇప్పుడు గ్రేటర్ ఎన్నికలకు వచ్చేసరికి ఆంధ్రవాళ్లను దువ్వుతున్న సంగతి చిన్నపిల్లలకు కూడా అర్ధమవుతుందని అన్నారు.

ఎపిలో కూడా పోటీచేస్తానని కెటిఆర్ అంటున్నారని,దానికి ముందుగా తెలుగుదేశం పార్టీని ఎందుకు తిట్టారో చెప్పాలని ఆయన డిమాండ్ చేశారు. కెటిఆర్ చెబుతున్నవన్ని ఆయన వ్యక్తిగతమా? లేక పార్టీ నిర్ణయమా అన్నది కూడా స్పష్టం చేయాలని రేవంత్ డిమాండ్ చేశారు.