ఉత్త‌మ్ వెన‌కే రేవంత్

నేను పార్టీ ప‌నుల‌లో భాగంగా మాత్ర‌మే ఢిల్లీకి వ‌చ్చాను. రాహుల్ గాంధీతో భేటీ కావ‌డం కూడా సాధార‌ణ అంశ‌మే, తాను రేవంత్ రెడ్డి రాహుల్ ను క‌లిశాం అన్న వార్త‌ల‌లో నిజం లేద‌ని తెలంగాణ కాంగ్రెస్ పార్టీ అధ్య‌క్షుడు ఉత్త‌మ్ కుమార్ రెడ్డి అన్నారు. నిన్న రాత్రి శంషాబాద్ చేరుకున్న ఆయ‌న‌ను రేవంత్ రెడ్డి పార్టీలోకి వ‌స్తున్నార‌న్న విష‌యంపై మీడియా ప్ర‌శ్నించ‌గా నో కామెంట్ అని స్పందిచారు. కాంగ్రెస్ ముఖ్యులు ఉత్త‌మ్ కుమార్ రెడ్డి - సీనియ‌ర్ నేత జానారెడ్డి ఢిల్లీలో ఉన్న స‌మ‌యంలో రేవంత్ ఉండ‌డం పార్టీ మారుతున్నాడ‌న్న ఊహాగానాల‌కు బ‌లం చేకూరుస్తుంది.

అయితే రేవంత్ రెడ్డి కాంగ్రెస్ పార్టీలో చేరుతున్నార‌న్న వార్త‌ల‌ను ముందుగా ఉత్త‌మ్ కుమార్ రెడ్డి - జానారెడ్డిలు ఇద్ద‌రూ ఖండించారు. త‌రువాత ఉత్త‌మ్ కుమార్ రెడ్డి నో కామెంట్ అని అన్నారు. ఉత్త‌మ్ కుమార్ రెడ్డి ఢిల్లీ నుండి వ‌చ్చిన వెంట‌నే మ‌రో విమానంలో రేవంత్ రెడ్డి కూడా హైద‌రాబాద్ చేరుకున్నారు. కాంగ్రెస్ పార్టీ అధ్య‌క్షుడిగా రాహుల్ గాంధీ బాధ్య‌త‌లు తీసుకునే లోపు రేవంత్ కాంగ్రెస్ కండువా కప్పుకుంటాడ‌న్న ప్ర‌చారం జ‌రుగుతుంది.

గ‌త రెండు రోజులుగా ఢిల్లీలో ఉన్నా ఎవ‌రి కంటా ప‌డ‌కుండా ఉన్న రేవంత్ రెడ్డి నిన్న పార్టీ మార్పు వార్త‌లు వ‌చ్చిన వెంట‌నే మీడియా ముందుకు రావడం, తెలంగాణ కాంగ్రెస్ నేత‌లు ఆ స‌మ‌యంలో అక్క‌డే ఉండ‌డం టీడీపీ నేత‌ల‌ను క‌ల‌వ‌ర పెడుతుంది. తెలంగాణ టీడీపీకి ఉన్న ముఖ్య నేత రేవంత్ పార్టీ మారితే పార్టీ ప‌రిస్థితి ఏంటా ? అన్న మీమాంస‌లో ప‌డ్డారు.