వైఎస్ ను ఫాలో అవుతున్న రేవంత్ రెడ్డి

ఎప్పటికైనా తెలంగాణ రాష్ర్టానికి సీఎం కావాలనుకుంటున్న టీడీపీ ఫైర్ బ్రాండ్ రేవంత్ రెడ్డి … తనను తాను మాజీ సీఎం దివంగత వైఎస్ రాజశేఖరరెడ్డితో పోల్చుకున్నారు. అంతేకాదు... వైఎస్ స్టైల్ - ఆయన సెంటిమెంట్లను కాపీ కొట్టి ... ఆ విషయం స్వయంగా ఒప్పుకొంటూ వైఎస్ బాటలో సాగుతున్నట్లు వెల్లడించారు.

గతంలో వైఎస్ ఏ కార్యక్రమం మొదలుపెట్టిన రంగారెడ్డి జిల్లా చేవెళ్ల నుంచి ప్రారంభించేవారు. చేవెళ్ల చెల్లెమ్మ సబితా ఇంద్రారెడ్డి చేతులు మీద కార్యక్రమాన్ని ప్రారంభించేవారు. పాదయాత్ర కూడా అలాగే మొదలుపెట్టారు. ఇప్పుడు రేవంత్ రెడ్డి కూడా తెలంగాణలో పాదయాత్రలకు ఇలాంటి సెంటిమెంట్లే ఫాలో అవుతున్నారు. భూపాలపల్లి నుంచి మొదలైన రైతు పోరు యాత్రలో రేవంత్ రెడ్డికి పార్టీ సీనియర్ నేత సీతక్క కుంకుమ తిలకం దిద్ది జెండా ఊపారు. ఈ సందర్భంగా మాట్లాడిన రేవంత్ రెడ్డి మాట్లాడుతూ... '' అప్పట్లో వైఎస్ రాజశేఖరరెడ్డికి సబితక్క ఎదురొచ్చి యాత్రలు ప్రారంభించినట్లుగా ఇప్పుడు తనకు సీతక్క ఎదురొచ్చి యాత్ర ప్రారంభింపజేశారని… ఈ సెంటిమెంట్ వర్కవుట్ అవుతుంది''' అంటూ బహిరంగ సభలోనే రేవంత్ చెప్పారు.

అయితే, రేవంత్ వైఎస్ నే కాదు మరో ప్రజానేత పీజేఆర్ సెంటిమెంట్లను కూడా ఫాలో అవుతున్నారు. పీజేఆర్ ఏ పనైనా జూబ్లీహిల్సు పెద్దమ్మ తల్లి ఆశీర్వాదం అందుకున్న తరువాతే ప్రారంభించేవారు. రేవంత్ కూడా కొద్ది రోజుల క్రితం పెద్దమ్మతల్లి దేవాలయం నుంచి సైకిల్ పై పార్టీ కార్యాలయానికి వచ్చారు. ఇక పై ఏ కార్యక్రమమైనా పెద్దమ్మతల్లి ఆశీస్సులతో చేపడతానని ఆ రోజు ప్రకటించారు. మొత్తానికి రేవంత్ దివంగత నేతల సెంటిమెంట్లను బాగానే ఫాలో అవుతున్నారు.. ఇది ఆయన్ను వారిలా లెజెండ్ ను చేస్తుందో లేదో తెలియదు కానీ... వైఎస్ ను ఫాలో అవుతున్నానని ప్రకటించినందుకు చంద్రబాబు ఏమంటారో చూడాలి.

Like Us on Facebook : https://www.facebook.com/Tupakidotcom/