లోకేశ్ పై రోజా పంచ్ అదిరిపోయింది..

సభలో అయినా, సమావేశాల్లోనైనా ఎక్కడ మాట్లాడినా ఏదో ఒక తప్పు దొర్లుతుండడంతో ఏపీ మంత్రి నారా లోకేశ్ విమర్శలు ఎదుర్కొంటున్న సంగతి తెలిసిందే. దీంతో లోకేశ్ పై ఇంటర్నెట్ లో, బయట కూడా తెగ సెటైర్లు పడుతున్నాయి. తాజాగా వైసీపీ ఎమ్మెల్యే రోజా అయితే ఆయనపై అదిరిపోయే పంచ్ వేశారు. తనకున్న అపారమైన తెలివితేటలను ప్రదర్శించడంలో జలీల్ ఖాన్ ను లోకేష్ బాబు మించిపోయారని రోజా వ్యాఖ్యానించారు. అబద్ధాలు చెప్పడంలో తండ్రి చంద్రబాబును మించిపోయారని అన్నారు.

చంద్రబాబు తన 21 విదేశీ పర్యటనలు చేసి, 21 ఉద్యోగాలను కూడా ఇవ్వలేకపోయారని.. ఇంతలో కొడుకు లోకేశ్ వచ్చి ఏకంగా రెండేళ్లలో ఆరు లక్షల మందికి ఉద్యోగాలు ఇచ్చేస్తానని అంటున్నారని, ఆయన్ను ఏమనాలో తనకు అర్థం కావడం లేదని చెప్పారు. వర్థంతికి, జయంతికి తేడా తెలియకుండా... ఏం మాట్లాడాలో తెలియకుండా, వర్థంతికి శుభాకాంక్షలు చెప్పిన దౌర్భాగ్యుడైన మంత్రిని రాష్ట్ర ప్రజలపై చంద్రబాబు రుద్దారంటూ నిప్పులు చెరిగారు. ఎంతో అనుభవమున్న పార్టీ నేతలను పక్కనబెట్టి, పార్టీ మారిన వారికి, రాజకీయ అనుభవం లేని వారికి, ప్రజా సమస్యలపై అవగాహన లేని వారికి చంద్రబాబు పెద్ద పీట వేశారని విమర్శలతో విరుచుకుపడ్డారు.

లోకేష్ బాబు గురించి చెప్పాలంటే, తాను న్యాయనిర్ణేతగా ఉన్న జబర్దస్త్ కామెడీ షో కూడా సరిపోదని రోజా ఎద్దేవా చేశారు. పంచాయితీ రాజ్ శాఖ కావాలని మీరు ఎందుకు కోరుకున్నారని ప్రశ్నిస్తే, తాగు నీటి సమస్యను సృష్టించడానికే మంత్రిని అయ్యానని ఆయన చెప్పడం చూస్తుంటే నవ్వొస్తోందన్నారు. తన తండ్రి పుట్టిన చిత్తూరు జిల్లాకు, కనీసం ఆయనను గెలిపిస్తున్న కుప్పంకు నీరివ్వలేని పరిస్థితి నెలకొందని, తనకు పిల్లనిచ్చిన మామ బాలకృష్ణ సొంత నియోజకవర్గం హిందూపురానికి నీరివ్వలేని లోకేష్ బాబు, రాష్ట్రమంతటికీ నీరిస్తామని జోకులు చెబుతున్నారని, ఇది సిగ్గు చేటని అన్నారు.

Like Us on Facebook : https://www.facebook.com/Tupakidotcom/