అంబేద్కర్ ను లాగిన ఆర్ఎస్ఎస్

దళిత నాయకుడిగా ప్రసిద్ది చెందిన బీఆర్ అంబేద్కర్ హిందు మతాభిమాని అని రాష్ర్టీయ స్వయం సేవక్ సంఘ్(ఆర్ఎస్ఎస్) చెప్తోంది. మతం మారిన హిందువులు తిరిగి హిందు మతంలోకి రావాలని అంబేద్కర్ కోరారని తెలుపుతోంది.

వచ్చే మంగళవారం అంబేద్కర్ 125 జయంతి నేపథ్యంలో 'అంబేద్కర్ గురించి కొన్ని నిజాలు' పేరుతో 200 పేజీల ప్రత్యేక సంపుటాల అనుబంధాన్నిఆర్ఎస్ఎస్ విడుదల చేయనుంది. అంబేద్కర్ మతం ఎందుకు మార్చుకున్నది, ఇస్లాంపై అంబేద్కర్ అభిప్రాయాలు, ఇస్లాం మతమార్పిడి, కమ్యూనిజం, ఆర్టికల్ 370 గురించి ఇందులో విపులంగా ఉండనున్నట్లు సమాచారం.

ఇప్పటివరకు ఆర్ఎస్ఎస్ వ్యవస్థాపకుడు కేబీ హెగ్డేవార్, అయోధ్యలో రామమందిర నిర్మాణంపైనే ఆర్ఎస్ఎస్ సంపుటాలు విడుదల చేసింది. కానీ ఇపుడు అంబేద్కర్ పై అలాంటి సంపుటి రానుంది. ప్రజలంతా ఐక్యంగా ఉండేందుకు అంబేద్కర్ ఏంచేశారో చెప్పాలని ఇటీవల నాగ్ పూర్ లో జరిగిన సమావేశంలో ఆర్ఎస్ఎస్ నాయకులు నిర్ణయించారు. జాతీయవాది అయిన అంబేద్కర్ పై ఆర్ఎస్ఎస్ విడుదల చేసే పుస్తకంలో పలువురు దళిత నేతల అభిప్రాయాలు ఉండనున్నట్లు సమాచారం. ఈ పుస్తకాన్ని సంఘ్ కార్యనిర్వాహక కార్యదర్శి భయ్యాజీ సురేశ్ జోషి విడుదల చేయనున్నారు.

అంబేద్కర్ ఇస్లాంలోని మొండి ప్రవర్తనను తప్పుపట్టేవారని ఆర్ఎస్ఎస్ పత్రిక అయిన పాంచజన్య ఎడిటర్ ప్రపుల్లా కేట్కర్ అన్నారు. ప్రపంచంలో ముస్లింలు ఎక్కడున్నా వారి మతానికే ప్రాధాన్యం ఇస్తారని పాకిస్తాన్ ను ఉద్దేశించి అంబేద్కర్ వ్యాఖ్యానించారని కేట్కర్ పేర్కొన్నారు. హైదరాబాద్ లోని దళితులు బలవంతంగా ముస్లిం మతంలోకి మారుతున్న సమయంలో అంబేద్కర్ అభ్యంతరం చెప్పారని ఆయన వెల్లడించారు. వారు తిరిగి హిందూమతంలోకి రావాలని అంబేద్కర్ కోరారని, ఈ విధంగా అంబేద్కర్ ఘర్ వాపసీకి మద్దతిచ్చారని అన్నారు. గాంధీజీకి ఇచ్చిన మాటమేరకు అంబేద్కర్ బౌద్దమతంలోకి మారరని, అయితే అదికూడా హిందూమతం దగ్గరి శాఖేనని కేట్కర్ వ్యాఖ్యానించారు.