క్రికెట్ దేవుడికి షేవ్ చేసిన బార్బ‌ర్ షాప్ గాళ్స్!

అత‌డ్ని చూసి రికార్డులు బెదిరిపోతుంటాయి. దేన్ని మిగిల్చ‌కుండా అన్నింటిని త‌న వ‌శం చేసుకోవ‌ట‌మేనా? అని అస‌హ‌న‌ప‌డుతుంటాయి. క్రికెట్ దేవుడి.. మాస్ట‌ర్ బ్లాస్ట‌ర్ గా క్రికెట్ ప్రియుల‌కు గుర్తుండిపోయే స‌చిన్ టెండూల్క‌ర్ కు చెందిన ఒక రికార్డును ఇద్ద‌రు సాదాసీదా అమ్మాయిలు బ్రేక్ చేశారు. రికార్డుల‌న్నీ స‌చిన్ ముందు సాగిల‌ప‌డితే.. అందుకు భిన్నంగా స‌చిన్ వ్య‌క్తిగ‌త రికార్డును యూత్ స్టార్స్ ఇద్ద‌రూ బ్రేక్ చేశారు. ఇంత‌కీ క్రికెట్ దేవుడి రికార్డును బ్రేక్ చేసిన క్రెడిట్ సాధించిన ఆ బార్బ‌ర్ షాప్ గాళ్స్ ఎవ‌రు? వారేం చేశార‌న్న‌ది చూస్తే..

ఉత్త‌ర‌ప్ర‌దేశ్ లోని బ‌న్వ‌రీ తోలా గ్రామంలో నేహ‌.. జ్యోతి అనే ఇద్ద‌రు అమ్మాయిలు సెలూన్ నిర్వ‌హిస్తున్నారు. బార్బ‌ర్ షాప్ అన్న‌ది మ‌గ‌వాళ్ల‌కే కాదు.. ఆడ‌వాళ్ల‌కు కూడా అద‌ర‌గొట్టేస్తారంటూ వీరిద్ద‌రూ నిరూపించారు. కేవ‌లం వృత్తి ప‌రంగానే కాదు.. విద్య ప‌రంగానే ఈ ఇద్ద‌రు మ‌హిళ‌లు విశేషంగా రాణిస్తున్నారు.

తండ్రికి చేదోడుగా ఉండేందుకు నేర్చుకున్న విద్య ఇప్పుడు వారిని కోట్ల‌ల్లో ఒక్క‌రిగా చేసింది. వీరి ప్ర‌తిభ గురించి మీడియాలో రావ‌టం.. అది ప్ర‌ఖ్యాత కంపెనీ జిల్లెట్ దృష్టిలో ప‌డ‌టంతో వారి క‌థ‌ను ఒక యాడ్ గా చేసింది స‌ద‌రు సంస్థ‌. దీంతో.. వీరికి బార్బ‌ర్ షాప్ గాళ్స్ అన్న బ్రాండ్ సొంత‌మైంది.

ఈ వీడియోను చూసిన క్రికెట్ దేవుడు రియాక్ట్ అయ్యారు. ఈ మ‌హిళ‌ల‌కు మ‌ద్ద‌తు ప‌లికేందుకు ఆయ‌న ముందుకొచ్చారు. నిత్యం క్లీన్ షేవ్ లో క‌నిపిస్తూ.. త‌న‌కు తాను త‌ప్పించి.. బ‌య‌ట‌వాళ్ల చేత షేవింగ్ చేయించుకునే అల‌వాటు లేని స‌చిన్ తాజాగా మాత్రం అందుకు భిన్నంగా వీరి చేత షేవ్ చేయించుకున్నారు. దీంతో.. క్రికెట్ దేవుడికి ఇంత‌కాలం షేవ్ ఎవ‌రూ చేయ‌ని రికార్డు బ‌ద్ధ‌లైంది. బార్బ‌ర్ గాళ్స్ ను క‌లుసుకోవ‌టం ఆనందంగా ఉంద‌ని.. వారికి జిల్లెట్ ఇండియా స్కాల‌ర్ షిప్ ను తాను అందించిన‌ట్లు స‌చిన్ పేర్కొన్నారు. ఇక‌.. స‌చిన్ కు షేవ్ చేసిన ఆనందంలో బార్బ‌ర్ గాళ్స్ తెగ ఎంజాయ్ చేస్తున్నారు.