దొరికిపోయాక(?) సుద్దపూసనా సచిన్

తన వ్యాపార భాగస్వామిగా చెప్పే స్నేహితుడికి కోసం తన పరపతిని వినియోగించి అడ్డంగా బుక్ అయిన క్రికెట్ దేవుడు సచిన్ టెండూల్కర్ డిఫెన్స్ లో పడ్డారు. డీఆర్ డీవోకు చెందిన ఇనిస్టిట్యూట్ ఆఫ్ టెక్నాలజీ మేనేజ్ మెంట్ వద్ద ఎలాంటి నిర్మాణాలు చేపట్టకూడదన్న బ్యాన్ ఉన్నప్పటికీ.. అక్కడ రిసార్ట్ నిర్మించటంపై డీఆర్ డీవో అధికారులు అభ్యంతరం వ్యక్తం చేయటం.. దీనికి సంబంధించి రక్షణ మంత్రి మనోహర్ పారికర్ తో సచిన్ టెండూల్కర్ భేటీ అయ్యారంటూ వచ్చిన వార్తలపై సచిన్ పెదవి విప్పారు.

అందరూ అనుకున్నట్లు సంజయ్ నారంగ్ తన వ్యాపార భాగస్వామి కాదని.. అలాంటి మాటల్లో నిజం లేదని చెప్పుకొచ్చారు సచిన్. మీడియాలో వచ్చినట్లుగా సంజయ్ నారంగ్ కు చెందిన రిసార్ట్ వ్యవహారంపై చర్చించేందుకు తాను పారికర్ తో భేటీ కాలేదన్నారు. తాను దేశంలోని చట్టాల్ని పాటించే వ్యక్తిగా సచిన్ పేర్కొన్నారు. నారంగ్ కు తనకు ఎలాంటి వ్యాపార లావాదేవీలు లేవని.. తాను కేవలం ల్యాండర్ రెసిడెన్సీలో బస చేసే వాడినని చెప్పుకొచ్చారు.

మరోవైపు ఇదే విషయంపై తమకు సంబంధించిన నిర్మాణాలు.. ఆస్తుల్లో అవినీతి అన్నది లేదని.. తాము నిర్మించిన కట్టడాలన్నీ చట్టబద్ధమైనవేనని చెప్పారు. సచిన్ తనకు వ్యక్తిగత స్నేహితుడిగా ఆయన పేర్కొన్నారు. కంటోన్మెంట్ ఏరియాలో ఉన్న పాత భవనాలకు తాము కేవలం మరమ్మతులు మాత్రమే చేశామని చెప్పుకొచ్చారు. మొత్తంగా చూస్తే.. తనకేమాత్రం అలవాటు లేని సరికొత్త ఆరోపణలతో క్రికెట్ దేవుడు ఉక్కిరిబిక్కిరి అయ్యారని చెప్పొచ్చు. ఇదిలా ఉంటే.. తాజా ఉదంతంలో సచిన్ దొరికిపోయారనన్న మాట సోషల్ మీడియాలో వ్యాఖ్యలు వినిపిస్తున్నాయి. సుద్దపూసలా కవర్ చేస్తున్నానని.. ఒకవేళ పైరవీ కోసం కాకపోతే రక్షణ మంత్రిని ఏ అంశంలో కలిశారో చెప్పొచ్చుగా అన్న ప్రశ్నలు సంధిస్తున్నారు. మరి..ఈ వివాదం ఇంకెక్కడి వరకూ వెళుతుందో చూడాలి.