మరో కడప బ్యాచ్ సైకిల్ ఎక్కనుందా?

కడప కోటే లక్ష్యంగా దూసుకెళుతున్న చంద్రబాబు.. తాను అనుకున్నట్లే కడప జిల్లాకు చెందిన మరికొందరు నేతల్ని సైకిల్ ఎక్కించేందుకు సిద్ధం చేశారన్న మాట బలంగా వినిపిస్తోంది. వైఎస్ జగన్ కు అండగా ఉంటూ.. ఢిల్లీ స్థాయిలో చేయాల్సిన పనుల్ని చేసి పెట్టే పెద్దమనిషిగా పేరున్న మైసూరారెడ్డి తిరిగి సైకిల్ ఎక్కేందుకు రెడీ అవుతున్నట్లు చెబుతున్నారు.

కడపజిల్లాలో జగన్ ఉన్నప్పటికీ.. ఆయన్ను కలవని మైసూరా.. పెండ్లిమర్రి.. కమలాపురం.. ఎర్రగుంట్ల ప్రాంతాలకు చెందిన నాయకులతో మాత్రం సమావేశం కావటం గమనార్హం. జిల్లాలోని పలు పెళ్లిళ్లకు హాజరయ్యేందుకు తాను వచ్చినట్లుగా చెబుతున్నప్పటికీ.. అసలు కారణం వేరే ఉందన్న మాట వినిపిస్తోంది. తాను టీడీపీలో చేరుతున్న నేపథ్యంలో.. ముఖ్యనేతలు.. కార్యకర్తలతో ఫీడ్ బ్యాక్ కోసమేనన్న మాట వినిపిస్తోంది.

మైసూరాతో పాటు.. వైఎస్సార్ కాంగ్రెస్ కు చెందిన మరో ఎమ్మెల్యేలు కూడా సైకిల్ ఎక్కే అవకాశం ఉందంటున్నారు. వీరితోపాటు.. కడప జిల్లాకు చెందిన సీనియర్ నేతలు.. మాజీ కేంద్రమంత్రి సాయి ప్రతాప్.. మాజీ మంత్రి అహ్మదుల్లాలు కూడా సైకిల్ ఎక్కటం ఖాయమంటున్నారు. రానున్న ఒకట్రెండు రోజుల్లో కడప జిల్లాకు సంబంధించి కీలక పరిణామాలు చోటు చేసుకోనున్నట్లు తెలుస్తోంది.