క‌శ్య‌ప్ ని పెళ్లి చేసుకో అంటూ సైనాకు రిక్వెస్టులు

బ్యాడ్మింట‌న్ స్టార్ సైనా నెహ్వాల్ విచిత్ర‌మైన ప‌రిస్థితి ఎదుర్కొంటున్నారు. దేశంలో బ్యాడ్మింట‌న్‌కు క్రేజ్ తీసుకొచ్చిన వారిలో సైనాను త‌క్కువ చేయ‌లేం. చిన్న వ‌య‌సులోనే చెల‌రేగిపోయి ప‌లు టోర్నీలు గెలుచుకొచ్చిన ఈ హైద‌రాబాదీ బ్యాడ్మింట‌న్ స్టార్ కు సంబంధించి ఎప్ప‌టి నుంచో ఒక పుకారు షికారు చేస్తూ ఉంది.

మ‌రో బ్యాడ్మింట‌న్ ఆట‌గాడు పారుప‌ల్లి క‌శ్య‌ప్ తో సైనా డేటింగ్ చేస్తుంద‌ని.. వారిద్ద‌రూ త్వ‌ర‌లోనే పెళ్లి చేసుకోవ‌టం ఖాయ‌మ‌న్న మాట బ‌లంగా వినిపిస్తూ ఉంటుంది. అయితే.. ఈ విష‌యాన్ని అటు సైనా కానీ ఇటు క‌శ్య‌ప్ కానీ ప్ర‌స్తావించింది లేదు.. రియాక్ట్ అయ్యింది లేదు. ఇదిలా ఉంటే.. తాజాగా హైద‌రాబాద్‌లోని ఒక రెస్టారెంట్లో క‌శ్య‌ప్ తో దిగిన ఫోటోను సైనా త‌న ఇన్ స్టాగ్రామ్‌లో పోస్ట్ చేసింది.

అంతే.. వీరిద్ద‌రి ఫోటో ఇప్పుడు వైర‌ల్ గా మారింది. వీరిద్ద‌రూ త్వ‌ర‌లో పెళ్లి చేసుకోనున్నారంటూ ఒక గాసిప్ జోరుగా ప్ర‌చారం సాగుతోంది. ఇదంతా ఒక ఎత్తు అయితే.. ఈ ఫోటోకు నెటిజ‌న్లు రియాక్ట్ అవుతూ.. ఇద్ద‌రూ ప‌ర్ ఫెక్ట్ జోడీ అని.. చూడ‌టానికి చ‌క్క‌గా ఉన్నారు.. డేటింగ్ వార్త‌ల్ని నిజం చేయండంటూ కొత్త త‌ర‌హాలో రిక్వెస్టులు చేస్తున్నారు.

ఇప్ప‌టికే బ్యాడ్మింట‌న్లో జంట‌గా మారారు.. నిజ జీవితంలోనూ జంట‌గా లైఫ్ స్టార్ట్ చేయ‌డంటూ ప‌లు రిక్వెస్టులు మెసేజ్ ల రూపంలో వ‌స్తుండ‌టం ఆస‌క్తిక‌రంగా మారింది. మ‌రి.. అభిమానులు అదే ప‌నిగా చేస్తున్న రిక్వెస్టుల విష‌యంలో సైనా.. క‌శ్య‌ప్ ఏం చేస్తారో చూడాలి.