‘‘రెడ్ క్వీన్’’ను చిత్తూరుకు తీసుకొస్తున్నారు

ఎయిర్ హోస్టెస్ గా పని చేసి.. ఆ తర్వాత మోడల్ గా మారి.. ఎర్రచందనం లేడీ స్మగ్లర్ అవతారం ఎత్తిన సంగీత వ్యవహారం మరో మలుపు తిరిగింది. ఎర్ర చందనం అక్రమ రవాణాలో కోట్లాది రూపాయిల బిజినెస్ చేస్తూ.. ‘రెడ్ క్వీన్’ గా పేరు పొందిన ఆమెకు షాక్ ఇవ్వటంలో ఏపీ పోలీసులు సక్సెస్ అయ్యారు. ఈ అంతర్జాతీయ లేడీ స్మగ్లర్ ను చిత్తూరు కోర్టుకు తీసుకురావాలన్న ప్రయత్నాలు ఫలించాయి.

మొదట్లో ఆమెను తక్కువగా అంచనా వేసి.. కోల్ కతాకు వెళ్లి అదుపులోకి తీసుకొని.. ఆమెను చిత్తూరు కోర్టుకు తరలించేందుకు ప్రయత్నించిన చిత్తూరు పోలీసులకు ఆమె తన రేంజ్ ఏమిటో చూపించటం తెలిసిందే. ఆమెను అదుపులోకి తీసుకున్న వెంటనే పాతిక మంది లాయర్లు సీన్లోకి వచ్చేసి ఆమెకు బెయిల్ వచ్చేలా చేయటం ఏపీ పోలీసులకు షాకింగ్ గా మారింది.

ఆమె నేరాల చిట్టాను ఆధారాలతో బయటపెట్టి.. ఆమెను చిత్తూరు కోర్టుకు తీసుకురావాలన్న ప్రయత్నాలు తాజాగా ఫలించాయి. తాజాగా రెండోసారి సెర్చ్ వారెంట్ తో వెళ్లిన చిత్తూరు పోలీసులు.. అక్కడి కమిషనర్ తో ఆమె విషయాన్ని చర్చించి ఆమె ఇంటిని సోదా చేశారు. ఈ సందర్భంగా పలు బ్యాంకు ఖాతాలు.. నగలు.. లాకర్లను ఫ్రీజ్ చేశారు. ఈ సందర్భంగా ఆమెకు సంబంధించి మరిన్ని ఆసక్తికర విషయాలు బయటకు వచ్చాయి. ఎర్రచందనం స్మగ్లర్ గా పేరున్న లక్ష్మణ్ ఆమెను రెండో పెళ్లి చేసుకున్న విషయాన్ని గర్తించారు. ఆమె ఆస్తుల్ని ఫ్రీజ్ చేసిన చిత్తూరు పోలీసులు ఆమెపై కేసులు నమోదు చేశారు. తాజా పరిణామాల నేపథ్యంలో ఆమె ఈ నెల 18న చిత్తూరు కోర్టుకు రావాల్సిన పరిస్థితి ఏర్పడింది. మరి.. రెడ్ క్వీన్ చిత్తూరు కోర్టుకు వస్తారా? లేదా? అన్నది చూడాలి.