పార్టనర్ కు ‘‘కోర్టు’’లో చుక్కలు చూపించింది

మార్టినా హింగిస్.. సానియా మీర్జా పేర్లు విన్న వెంటనే ప్రతి భారతీయుడి మోము చిరునవ్వులు చిందిస్తుంది. సానటీనాగా పేరొందిన ఈ జంట ఇప్పటికే రికార్డు స్థాయిలో వరుస విజయాలు సాధిస్తూ దూసుకెళుతున్న సంగతి తెలిసిందే. టెన్నిస్ మహిళా డబుల్స్ లో ఈ జంట ఇప్పటికే సాధించిన వరుస విజయాలు వరల్డ్ రికార్డును సృష్టించాయి. మరి.. ఈ జంట ఇద్దరూ ప్రత్యర్థులుగా టెన్నిస్ కోర్టులో తలపడితే?

వినేందుకే ఆసక్తిగా ఉన్న వ్యవహారం వాస్తవంలోకి వచ్చింది. ఆస్ట్రేలియా ఓపెన్ టెన్నిస్ మిక్సెడ్ డబుల్స్ లో లియాండర్ పేస్ తో కలిసి జత కట్టిన మార్టినా హింగిస్ ను.. సానియా మీర్జా.. ఇవాన్ డోడిగ్ (క్రోయేషియా) జంట ఓడించటం విశేషం. ఇరువురి మధ్య జరిగిన మ్యాచ్ లో 7-6, 6-3 తేడాతో పేస్- హింగిస్ ద్వయాన్ని సానియా టీం ఓడించింది.

పార్టనర్స్ గా మహిళా డబుల్స్ లో ఇరగదీస్తున్న సానియా.. హింగిస్ లు ప్రత్యర్థులుగా బరిలోకి దిగిన తర్వాతి రోజే వీరిద్దరూ కలిసి ఆస్ట్రేలియా మహిళా డబుల్స్ ఫైనల్స్ లో జంటగా దిగనుండటం మరింత ఆసక్తికరం. ఆస్ట్రేలియా డబుల్స్ ఫైనల్ లో సానటీనా జంట విజయం సాధిస్తే.. వరుస విజయాల్లో మరో ప్రపంచ రికార్డు సృష్టించినట్లే. మరి.. ఆ తీపి కబురు కోసం కోట్లాది భారతీయులు ఆసక్తిగా ఎదురుచూస్తున్నారనే చెప్పాలి.