భారత్ కు మరో డబుల్ థమాకా?

టెన్నిస్ లో భారత్ జోరు సాగుతోంది. మొన్నామధ్య వింబుల్డన్ మహిళా డబుల్స్.. మిక్సెడ్ డబుల్స్ లలో ట్రోఫీ సొంతం చేసుకున్న సానియామీర్జా.. పేస్ లు మరోసారి అలాంటి బహుమానాన్నే భారత్ కు అందించే దిశగా అడుగులు వేస్తున్నారు. అన్నీ అనుకున్నట్లు జరిగితే.. ఈ సీజన్ లో చివరిదైన యూఎస్ ఓపెన్ లో మరో చారిత్రక విజయాన్ని సాధించేందుకు అడుగు దూరంలో ఉన్నారు.

యూఎస్ డబుల్స్ లో సానియా మీర్జా.. మార్టినా హింగిస్ (స్విట్జర్లాండ్) జంట ఫైనల్స్ కు దూసుకెళ్లింది. ఆదివారం జరిగే ఫైనల్ లో సానియా హింగిస్ జంట కానీ విజయం సాధిస్తే ఈ ఇద్దరి కాంబినేషన్ లో యూఎస్ టైటిల్ సొంతం కానుంది.

ఇక.. మిక్సెడ్ డబుల్స్ లో భారత్ కు చెందిన లియాండర్ పేస్ తో జత కట్టిన మార్టినా హింగిస్.. ఫైనల్ కు చేరుకున్నారు. టైటిల్ సాధనకు మరో అడుగు దూరంలో ఉన్న వీరిద్దరూ.. శుక్రవారం రాత్రి 9.30 (భారత కాలమానం ప్రకారం) మొదలయ్యే ఫైనల్ పోటీకి సిద్ధమవుతున్నారు. అన్నీ అనుకున్నట్లు జరిగితే.. భారత్ యూఎస్ ఓపెన్ కు సంబంధించి డబుల్ థమాకా ఖాయమన్న భావన వ్యక్తమవుతోంది.