ఆ జంట మరో టైటిల్ తెచ్చేశారు

ఉరకలెత్తే ఉత్సాహంతో దూసుకెళుతున్న సానియామీర్జా.. మార్టినా హింగిస్ ల దూకుడుకు మరో టైటిల్ సొంతమైంది. టోర్నీ ఏదైనా.. ఈ జంట కానీ గ్రౌండ్ లోకి దిగితే.. టైటిల్ సొంతం కావటం ఈ మధ్య తరచూ జరుగుతోంది. తాజాగా. ఈ జంట చైనా ఓపెన్ మహిళల డబుల్స్ టైటిల్ ను చేజిక్కించుకుంది. తాజా విజయంతో ఈ ఏడాది ఎనిమిది టోర్నీల విజేతలుగా నిలిచారు.

శనివారం జరిగిన హోరాహోరీ ఫైనల్స్ లో వారు కాస్త తడబాటుకు గురైనా.. అనంతరం సర్దుకొని తమ దూకుడుతో టైటిల్ ను సొంతం చేసుకున్నారు. ఈ భారత.. స్విస్ జంట గడిచిన నాలుగు టోర్నీల్లో కేవలం రెండంటే రెండు సెట్లు మాత్రమే కోల్పోవటం విశేషం. ఇక.. తాజా పోటీ విషయానికి వస్తే మాత్రం.. ఫైనల్ లో విజయం సాధించటానికి కాస్త ఎక్కువ కష్టపడ్డారనే చెప్పాలి. దాదాపు గంటా నలభై నిమిషాల పాటుసాగిన ఈ మ్యాచ్ అద్యంతకం పోటాపోటీగా సాగింది. తొలిసెట్ లో ట్రై బ్రేక్ లో చేజార్చుకున్న సానియా.. హింగిస్ ద్వయం.. రెండోసెట్లో విజృభించి ఆ సెట్ ను సొంతం చేసుకున్నారు. ఆ తర్వాతి సెట్ సైతం పోటాపోటీగా నడిచింది. తీవ్ర ప్రతిఘటన ఎదురైనా.. తట్టుకొని ప్రత్యర్థులపై విజయం సాధించారు. తామిద్దరం కలిస్తే.. పోటీ ఏదైనా.. టోర్నీ ఏదైనా టైటిల్ మాత్రం తమదేనన్నట్లుగా సాగిపోతున్న వీరి ప్రయాణం ఇలానే సాగాలని కోరుకుందాం.