వైరల్: హైదరాబాద్ లో ఒళ్లు గగుర్పొడిచే ప్రమాదం

తాగితే మిన్నూ మన్నూ కానరాదంటారు. పైగా తాగి కారు నడిపితే.. అది విలాసవంతైన ఆడి కారు అయితే.. ఇక పట్టపగ్గాలు ఉంటాయా? తాగిన మత్తులో ఫుల్ స్పీడుగా వెళుతూ ప్రాణాలు బలితీసుకున్నారు. రెప్పపాటులో అతివేగంతో కారు ఫుల్ స్పీడుతో ఢీకొట్టడంతో కారు ఎగిరి చెల్లాచెదురుగా మారింది.

తాగి వాహనాలు నడపడం.. ర్యాష్ డ్రైవింగ్ వల్ల జరిగే ప్రమాదాలతో అనేక కుటుంబాల్లో తీరని విషాదం మిగులుతోంది. ఓవర్ స్పీడు, సిగ్నల్ జంప్ చేయడం.. నిర్లక్ష్యంతో కారు నడపడంతో ఎదురుగా వచ్చే వాహనాలను చూసుకోకుండా ఢీ కొడుతున్నారు. దీనివల్ల ప్రాణాలు పోయి బాధిత కుటుంబాలు రోడ్డున పడుతున్నాయి.

తాజాగా హైదరాబాద్ లో దారుణం వెలుగుచూసింది. ఈ వీడియోను సైబరాబాద్ ట్రాఫిక్ పోలీసులు ట్విట్టర్ లో షేర్ చేశాడు. అది వైరల్ గా మారింది.హైదరాబాద్ లోని ఇనార్బిట్ మాల్ సమీపంలో జరిగిన ఈ ప్రమాదం గగుర్పొడిచేలా ఉంది. రెప్పపాటులో అంతా జరిగిపోయింది. ఓవర్ స్పీడుతో దూసుకొచ్చిన ఓ ఆడికారు.. ఆటోను బలంగా ఢీకొట్టింది. దీంతో ఆటో గిరాగిరా తిరుగుతూ డివైడర్ ను ఢీకొట్టి బోల్తాపడింది.

ఈ ఘోర ప్రమాదంలో ఆటోలో ప్రయాణిస్తున్న వ్యక్తి మృతిచెందినట్టు పోలీసులు తెలిపారు. ఆటో డ్రైవర్ కు తీవ్ర గాయాలయ్యాయని సమాచారం.

జూన్ 27న తెల్లవారుజామున ఈ ప్రమాదం జరిగినట్లు తెలుస్తోంది. యాక్సిడెంట్ దృశ్యాలు సీసీ ఫుటేజీలో రికార్డు కావడంతో సీన్ వెలుగులోకి వచ్చింది.