చిదంబరం ట్వీట్ కు షాకింగ్ వ్యాఖ్యలు చేసిన దాదా కుమార్తె

పొగడ్త తప్పేం కాదు. కానీ.. సమయం సందర్భం చాలా అవసరం. ఆ విషయాన్ని మర్చిపోయిన కాంగ్రెస్ సీనియర్ నేత చిదంబరంపై తీవ్రస్థాయిలో విరుచుకుపడ్డారు మాజీ రాష్ట్రపతి ప్రణబ్ దా కుమార్తె కమ్ కాంగ్రెస్ మహిళా ఫైర్ బ్రాండ్ శర్మిష్ట ముఖర్జీ. ఢిల్లీ అసెంబ్లీ ఎన్నికల్లో బీజేపీ పరాజయం పై చిదంబరం ఒక ట్వీట్ చేశారు. ఆమ్ ఆద్మీ పార్టీ విజయాన్ని ఆయన పొగిడారు. ఆ క్రమంలో తమ పార్టీ ఘోర పరాజయాన్ని మర్చిపోయినట్లుగా ఆయన ట్వీట్ చూసినంతనే అనిపించక మానదు.

ఓ పక్క ఢిల్లీ రాష్ట్ర ఎన్నికల్లో ఒక్కటంటే ఒక్క సీటు కూడా గెలవని దీన స్థితిలో కాంగ్రెస్ ఉండటాన్ని కాంగ్రెస్ నేతలు జీర్ణించుకోలేకపోతున్న వేళ.. అందుకు భిన్నంగా సీనియర్ నేత చిదంబరం ఒక ట్వీట్ చేశారు. ఢిల్లీ రాష్ట్రంలో ఉండే వివిధ రాష్ట్రాల ప్రజలు బీజేపీని ఓడించారన్నారు. ప్రమాదకరమైన బీజేపీ ఎజెండాను రిజెక్ట్ చేశారన్న ఆయన.. వచ్చే రెండేళ్లలో వివిధ రాష్ట్రాల్లో జరిగే అసెంబ్లీ ఎన్నికలకు ముందే ఢిల్లీ ప్రజలు చక్కటి సందేశాన్ని ఇచ్చారన్నారు. ఆమ్ ఆద్మీ పార్టీ విజయాన్ని పొగిడారు.

దీనిపై శర్మిష్ఠా తీవ్రంగా మండి పడ్డారు. చిదంబరంజీ.. బీజేపీ ని ఓడించే పనిని ప్రాంతీయ పార్టీలకు కాంగ్రెస్ అప్పగించిందా? లేదంటే పార్టీ పరాజయాన్ని పక్కన పెట్టి ఆప్ విజయాన్ని సంబరంగా జరుపుకోవటం ఏమిటి? నా ప్రశ్నకు మీ సమాధానం అవునని అయితే పీసీసీ దుకాణాలను మూసేద్దామని ఫైర్ అయ్యారు. చిదంబరం లాంటి సీనియర్ నేత పొగడ్త పై ప్రణబ్ దా కుమార్తె ఇంతలా విరుచుకుపడటం ఇప్పుడు అందరిని ఆకర్షిస్తోంది.